تينچليك عالي كينكشي و مدني جماعه چيليك اداره لراورته سيده همكارليك حجت امضالندي

كابلده افغانستان تينچليك عالي كينگشي و مدني جماعه چيليك اداره لر ارا اهالي ني تينچليككه ترغيبلش مصلحت بيريش حجتي امضالنگن.تينچليك عالي كينگشي تدبيري بيلن كابلده اويوشتيريلگن ييغينده، افغانستان بويلب يوزلب مدني جماعه چيليك فعاللري اشتراك ايتيب، مملكت ده تينچليك تامينلنيشي اوچون همكارليك كورستيشلريني تاكيدله گنلر.

كابلده اوتكزيلگن ييغين سونگيده نشر ايتيلگن بو حجتده، مذكور اداره لر ارا مصلحت، همكارليك وعملي چاره تدبيرلر كوريب چيقيش بيش ماده لي موضوعلر قيد ايتيلگن. مذكور بيش ماده ده شونينگ ديك، تينچليك عالي كينگشي واهالي آره سيده علاقه اورنه تيش، مدني جماعه چيليك نينگ رولي، اهالي گه تينچليك موضوعلر باره سيده تخنيكي و مسلكي تعليم بيريش، و تحليلي تعليماتلر كيريتيلگن.

تينچليك عالي كينگش اعضاسي عبدالحكيم گه كوره، مدمني جماعه چيليك اداره لرخلق وتينچليك عالي كينگش اورته سيده علاقه اورنه تيش ده يخشي خذمت قيله دي:" بو ييغيندن اساسي مقصد، افغانستانده قنده ي قيليب، تينچليك ني تامينلش شيوه لريني كوريب چيقيشدن عبارت. مدني جماعه چيليك فعاللري همده دين عالملري تينچليك تامينلنيشي توغريسيده قنده ي رول اوينه شي ني محاكمه ايتديك، بولر صلح تامينلنيشي ده او مسووليتلريني بجريشي كيره ك".

باشقه تماندن مدني جماعه چيليك اداره لرنينگ باشقه بير فعالي سيد رحيم ستار، حاضر وضعيتي باره سيده خواطر بيلديريب، تينچليك عالي كينگشي ايچيده گي موجود كمچيليكلر برطرف ايتيليشي كيره كليگي باره سيده تاكيدله ماقده:"كيله جكده قنده ي ميكانيزم بيلن فايده لنيشي و قنده ي شيوه لر عملي قيلينيشي معلوم قيلينمه گن. عملي نقطه نظريدن اگر گپيرماقچي بولسم، تينچليك جرياني گه قوشيلگن شخصلر گه هيچ قنده ي همكارليك قيلينمه گن، اولر يالغيز قاليشگن ايش زميه سي يره تيلمه گن. بيز شفافيت ني ايسته ي ميز، اهالي اورته ايشانچ اورنه تيليشي كيره ك".

او، مملكتده صلح وبرقرارليك تامينلنيشي اوچون سياسي عزم كيره ك، اما ايكله تمان اورته سيده امضالنگن حجت ده عملي حركت لرنينگ قنده ي عملگه آشيريليشي باره سيده آچيق معلومات بيريلمه گن دييدي.

ييغينده، افغانستان بويلب اشتراك ايتگن يوزلب مدني جماعه چيليك فعاللري، تينچليك عالي كينگشي ني شفاف روشده همكارليك كورستيني تاكيدلشدي. اما اولردن بيرتعدادي تينچليك عالي كينگشي نينگ تشكيليده مدني جماعه چيليك فعاللريگه اورين بيريلمه گني تنقيد ايتيشدي.