ملي جبهه محمد محقق نينگ سونگي اظهاراتيگه عكس العمل بيلديردي

ملی جبهه بیر اعلامیه ترقه تیب، محمد محقق نينگ سياسي گروه گه قوشيلگني ني اونينگ شخصي قرار ديب حرمت قايل ايكني ني بيلديرگن، اما اونينگ ملي جبهه سياستچيلريني عيبله گني، مناسب فکر صفتيده كوريلمه گن.

اعلاميه ده، ملي جبهه اونگه قطار مملكتلرنينگ رهبرلري بيلن مصلحت اوتكزيش مسووليتيني تاپشيرمه گني قيد ايتيلگن.

عینی حالده افغانستان ملي جبهه رهبرليگي تمانيدن ييتيب كيگن اعلاميه گه کوره، بو جبهه مملكت اساسي قانوني و مدني حركت لرگه اساسلنيب، سيلاولرني اوتيش دور اوچون يگانه معقول يول ديب، جريانگه قوشيليش مملكت نينگ هر بير فقراسي و سياسي حزبي نينگ حقوقي ايكنليگي باره سيده تاكيدله گن.

بوندن آلدین افغانستان وحدت حزبي رهبري محمد محقق، اوزيگه يقين دوستلريدن بيريگه سونگي بير نيچه هفته او، وبير نيچه تنيقلي سياستچيلر اورته سيده پيدا بولگن جنجل تفصيلاتيني ايتيب، اوزي نينگ فیسبوك صحيفه سيده يازيب قويگن.

محمد محقق سونگيده جمهور رييسليك نامزدلريدن بيريگه معاونليك لوازيميني قولگه كيريتيش مقصديده، پارلمان نماينده ليگي دن استعفا بيردي.

محمد محقق نينگ بو ظهاراتي، اجتماعي ترماغلرده هم عكس ايتديريليب، قطار عكس العمللرگه روپه ره بولگن.

اما افغانستان ده بونده ي معلوماتلركيچيكتيريليب، عاموي اخبارات واسطه لريگه ييتيب كيله دي.

حتي بعضي ييغينلر اگر جمهور رييسليك سراييده هم بوليب اوته ديگن بولسه، اونينگ تفصيلاتي اوچ كون تورت كون دن كيين ميش ميش روشده تيلدن تيلگه اوته دي. بو خبرلرني روايت قيله ديگن لر باشقه گه اوندن يخشي روشده خبر دار بوليشگه رخصت بيرمه يدي.

محقق جنابلري نينگ سونگي اظهاراتي بير مكتوب بوليب، اوني انگليس تيليده گي افغانستان آوت لوك روزنامه سي باش محريري دكتر حسن ياسا گه يول لگن.

ياسا جنابلري اوزي نينگ محقق جنابلري گه يول له گن مكتوبيده اوزينگيز یالغيز حركت قيلمنگ، يانينگيزده گي همكارلرينيگيز ني حمايه قيليب، يول آلينگن ديب يازگن. اوشونينگ ديك، يالغيز كيتيش خطر دن خالي ايمس ديگن.

اوچره شوولر تفصيلاتي فاش ايتيلدي

سونگي ده محمد محقق اوزي نينگ قديمي همكاري ودوستي جنرال دوستم ني يالغيز قوييب، عبدالله عبدالله نينگ تيميگه باريب قوشيلدي. او مذكور تيمگه باريب قوشيلگني سببي ني ايتيب، سياسي رهبرلر بيلن اوتكزگن اوچره شوولر تفصيلاتي ني هم فاش ايتدي. بو افشاگرليك افغانستانده مثلي كوريلمه گن درجه ده بولدي.

مثال اوچون محقق جنابلري"جنرال دوستم و عطا محمد نور بيلن تاشكنتده قرآن گه قسم ياد قيلديك" بيز بو ييل تاشكينتده اوچله ميز سيلاولرده بيرگه حركت قيليشيميزگه كيليشديك.... اما افغانستان گه كيلگنيميزدن كيين جنرال دوستم باشقه ايكي مسله ني اورته گه قويدي. اولردن بيري داكتر عبدالله گه قوشيلمه ي ميز، ايكينيچي بيرينچي معاونليك لوازمي. بو ايكي شرايط عملگه تينگ كيله ديگن گپ ايمس ايدي.

اوتگن ييل محمد محقق، جنرال دوستم، و احمد ضيا مسعود ملي جبهه ني ايجاد ايتيشدي.

اما محقق بو مكتوبده احمد ضيا نينگ نامزدليگي ني حمايه ايتمه گني سببب ني ايضاحله گن:" بيز افغانستان قضیه سيگه دخيل بير قطار شرقي وغربي مملكت لردن بيلن اوچره شيب، سيلاولرده احمد ضيا نينگ نامزدليگي ني اورته گه قويديك، اما اولر بو تكليف ني حمايه قيليشمه دي. ايچكي و خارجي حمايه گه ايگه بولمه گن آدم بيلن قنده ي قيليب يول كيتيش ممكن؟"

او اوزي نينگ مكتبوبيده احمد ضيا نينگ ييغينگه كيلمه ي خفه ليگي ني فاش ايته دي. عكس حالده، اولر اونينگ اوييگه بارماقچي بوله دي، اما او ايشيگي ني اولرنينگ يوزيگه ياپيب قويه دي.

اما همه مهمي بو كبي فاش ايتيشلر افغانستان سياستچيلريگه قنده ي تاثير اوتكزيشي ممكن.

جنرال دوستم هم اوتگن بير نيچه هفته ايچيده، قطار ايستك و امتيازلرني سوره گن، بو عاموي اخبارات واسطه لريگه بار بار بحثگه ايلنگن.

شونگه قره مسدن، محقق جنابلري اوز مكتوبيده كيله دولت اوچون قنده ي لايحه لر ايشلب چيقگني همده عبدالله عبدالله ني نيمه سبب تنله گني سببلريني ايتمه گن.

اما محقق نينگ فاش ايتگن مكتوبي گه آلدينگي ملي خوفسيزليك اداره سي رييسي امرالله صالح عكس العمل بيلديريب، اوني "تهمت" ديب قاره گن. او محقق جنابلري نينگ مكتوبيگه قتيق الفاظ بيلن جواب قيته ريب، محقق جنابلريني خارجي مملكتلر و ايلچيخانه لر بيلن مصلحت آليش گه تكليف قيلگنليكده عيبله گن.