عبدالله عبدالله 1393 ييلده گي سيلاوده اوز نامزدليگيني ايلگري سوردي

افغانستان ايتلاف رهبري عبدالله عبدالله اوزيني جمهور رييسليك سيلاولريده نامزد قيلدي.

او اسلامي حزب گه باغليق محمد خان ني بيرينچي معاون و محمد محقق ني ايكينچي معاون صفتيده تنيشتيرگن.

عبدالله عبدالله اوز نامزدليگي قويگن دن سونگ، مطبوعات گه اساسي قانون ني حمايه ايتيب، اداري فساد وكمبغلليككه قرشي كوره شيشي ني ايتدي.

عبدالله جنابلري موجود حاكميت ني قورت مركزلشگني و فساد ميزاني آشگني گه سبب بولگني ني ايتيب، حاكميتگه ايريشگن حالده، اساسي قانون ني اوزگرتيره من ديدي.

عبدالله عبدالله ني رويخط دن اوتكزيش چاغيده معاونلريدن تشقري حمايه چيلري جمله دن يونس قانوني، عبدالهادي ارغنديوال، صلاح الدين رباني، عطامحمد نور، نورالحق علومي وبيرقطار نماينده لريولداش قيليشگن.

ايتيليشيچه، دولت گه مخالف اسلامي حزب نينگ باشقه بوليملري جمله دن وحيدالله سباوون، و حكمتيار رهبرليگي ده گي اسلامي حزبي، بو ايتلاف ني حمايه ايتيشمه يدي.

شونينگ ديك، بير دهه دن آرتيق مدت ايچيده ايلك بار ديركه اسلامي جمعيت نينگ اكثريت سيمالريني بيرگه ليكده بير نامزد ني حمايه ايتيشماقده.

اولگي سيلاولرده بو حزب نينگ بيرقسمي يونس قانوني نامزدليگي ني حمايه ايتيشدي و باشقه قسمي ايسه حامدكرزي ني قوللب قوتلشگن ايدي. ايكينچي سيلاولرده جمعيت رهبري عبدالله ني حمايه قيليب، جنرال فهيم ايسه كرزي جنابلريني همكارليك قيلدي.

عين حالده، جمعيت حزبي نينگ اينگ مهم اعضالري دن بولگن احمد ضيا مسعود وامرالله صالح عبدالله ني حمايه قيلمه ي، ملي جنبش رهبري عبدالرشيد دوستم بيلن سيلاولر ينگي ايتلافيني تشكيل ايتيش بيلن، باشقه بير نامزد ني حمايه قيليشلري كوتيله دي.

عبدالله جنابلري 2009 ييلده گي جمهور رييسليك سيلاولريده حامدكرزي نينگ اينگ مهم رقيبلريدن بيري ايدي.

افغانستان سيلاولر شكايت لريني تينگلش كميسيوني نينگ اعلاميه سيگه كوره، كرزي جنابلري 49 فايز و عبدالله عبدالله 31 فايز آواز قولگه كيريتگن.

عبدالله عبدالله ايكينچي شخص صفتيده رسمآ اوزيني جمهور رييسليك سيلاولريده نامزد قيلگن.

ايتيليشيچه، زلمي رسول، عبدالرب رسول سياف و حنيف اتمرلر هم اوز نامزدليگي ني ايلگري سوريشه دي.