هرات محبوسلري نينگ آچليك اعلاني اوزنهايه سيگه ييتدي

هرات قماقخانه سي قومانداني جنرال عبدالمجيد صادقي نینگ ایتیشیچه، اوتگن كيچه نشر ايتيلگن اعلاميه ده، ايكي مينگگه يقين محبوس نينگ آچليك اعلاني اوز پایانی گه ييتگني قيد ايتيلگن.

توقيز كوندن بيري هرات قماقخانه سيده گي محبوسلرنينگ آچليك اعلاني بوگون اوز نهايه سيگه ييتگن.

صادقی جنابلری گه کوره، اوتگن كون كابلدن هراتگه كيلگن هياتلر محبوسلر بيلن ديدارلشيب، اولرنينگ قيينچيليكلريگه امكانيت يره تيشني وعده بيرگنلر.

بي بي سي نينگ هرات ده گي مخبريگه كوره، كيلگن هيآتلر ساني 22 كيشي بوليب، اولر پارلمان، عدلي وقضايي اداره لر، ايچكي ايشلر وزيرليگي همده محكمه نماينده لري دن عبارت بولگن. بوهيات لر محبوسلرنينگ ايستكلريگه تاباريچه قانون يوزه سيدن امكانيت يره تيب بيريشني وعده بيريشگن.

هرات قماقخانه سي قومانداني، آچليك اعلان ايتگنلرنينگ جسماني وضعيتيني يخشي ديب توصيفله گن.

بوآچليك اعلاني يكشنبه كوني سنبله آيي نينگ 31 ده، 300 محبوس تمانيدن باشلندي. اما ايكينچي كوني محبوسلرساني 1461 گه ايتيشدي وچهارشنبه كوني ايسه، باشقه قبتده گي محبوسلرهم قتنشيب اولرنينگ ساني ايكي مينگگه باريشدي.

آچليك اعلان ايتگنلر، جنايت گه حكم قيلگن لردن باشلب، دولت گه مخالف گروه لر بولگن.

آچليك اعلان قيلگنلر، ايريم جنايتچيلرنينگ جمهور رييس دن، اولرني برچه جرملري كميتيريشيني نظرگه آليشيني سوره گن ايديلر.

افغانستان جمهور رييسي ملي و مذهبي مناسبتلرده خوفسيزليك اوچون جنايتچيلرنينگ عفو ايتيش همده ايريم جناتچيلرنينگ جزالريني كميتيريش اوچون فرمان صادرايته دي. ايچكي وتشقي، اويوشتيرووچي ماده لرگه تيگيشلي مجرم لرني همده گروگه آله ديگنلر بو فرمان گه شامل بولمه گن.

توقيز كوندن بويان هراتده آچليك اعلان ايتگن محبوسلر، فقط جمهور رييسليك اداره سي دن كيلگن هيات بيلن ديدارلشگن.

حاضرگي كونده هرات قماقخانه سيده 32000 محبوس قماق جزاسيني اوته ماقده.