قريلراوچون اينگ يخشي مملكت سويس، افغانستان اينگ آخرگي اورينده

"دنيا جوده تيز قريماقده، 60 ياشلي انسانلر بيش ياشگچه بولگن باله لر سانيدن آشماقده"

خلق ارا قريلركوني مناسبتي بيلن خلق ارا جهاني اگ واچ ايندكس تشكيلاتي كيكسه لر اوچون اينگ يخشي مملكتلر رويخطيني اعلان قيلگن.

اونگه كوره، 60 ياشدن آشگن انسانلراوچون اينگ قوله ي شرايط سويس ده يره تيلگن، ديب تاپيلگن.

قري لرگه كمك بيريش خلق ارا تشكيلاتي مملكتلر رويخطيني بيرلشگن ملتلر بيلن بيرگه ليكده توزيب چيققن.

شونينگديك، شمالي اوروپانينگ قطار دولتلري كيكسه ليك دوريني اوتكزيش اوچون موجود قوله ي ليكلري بيلن مقته نيشي ممكن ايكن.

بو قوله ي ليكلر قطاريگه كيكسه لر اوچون نفقه وامتيازلر، قوله ي ترانسپورت خذمتي وجمعيت نينگ بيرقسمي ايكنليگيني حس قيليب توريشني بيروچي مناسبت كوزده توتيلگن.

سويس دن سونگ ناروي وآلمان يوقاري اوچليككه كيرگن. اوندن سونگ، هالند، كانادا، ينگي زيلاند، امريكا، آيسلند و جاپان اونته ليكني دوام ايتتيردي.

رويخط نينگ اينگ آخري 91- قطاريني افغانستان ايگلله گن. تانزانيا وپاكستان ايسه قري لراوچون افغانستاندن يخشيراق شرايط بارديب قره ليبدي.

افغانستانده كيكسه لرجوده ناچار شرايط لرده قاليشه دي.

سابق اتفاق مملكتلري ايچيده قري لرگه يره تيلگن محيط بيلن ايستانيا 29- اورنني ايگلله گن. گرجستان، ليتوانيا، ارمنستان اوندن كيينگي قطارلرده كوريش ممكن.

تاجكستان 52 اورينده، بيلاروس 60، قيرغيزستان 63، اوكراين 66، روسيه ايسه 78 اورينده لايق تاپيلگن.

اوزبيكستان كيكسه لرگه يره تيلگن شرايط باره سيده رويخط نينگ نيچينچي اورنيگه ماسليگي حقيده معلومات يوق.

رويخط دنياده گي كيكسه كيشيلرنينگ 89 فايزيني قمره ب آلگن، بو91 مملكتدن قريب 900 مليون انسان ديگني دير.

"دنيا جوده تيز قري ماقده. 60 ياشلي انسانلر بيش ياشگچه بولگن باله لرسانيدن آشماقده، 2050 ييلگه كيليب اولرنينگ ساني 15 ياشگچه بولگن باله لرسانيدن آشيشي ممكن.

بيراق قرريش معماسي جهاني و ملي لايحه لرتركيبيدن توشيب قالماقده. قرريليك معماسي كوپراق اعتبار طلب قيله دي"،- ديب ايتگن قري لرگه كمك بيريش خلق ارا تشكلاتي نينگ باشقرووچي مديري سيلوي ستيواناني.

اوزبيكستانده كيكسه لرگه يره تيلگن شرايط قنده ي ليگي رويخطده كيلتيريلمه گن.

دنيا ده هردقيقه ده ايكي كيشي اوزي نينگ 60 ياشگه تولگنيني نشانله يدي، ييل دواميده 60 ياشني قرشيلاوچيلر58 مليونگه ييته دي.

2012 ييلده 810 مليون انسان ياشدن كتته بوليب، يير يوزي اهاليسي نينگ 11،5 فايزيني تشكيل قيلگن.

تخمين قيلينيشيچه، بو رقم 10 ييلدن كم فرصتده 1 مليونگه ييتيب باره دي.

2050 ييلده ايسه 2 مليارد، ياكه بوتون اهالي نينگ 22 فايزيني تشكيل قيله دي، ديگن فكرلر بيلديريلماقده.