افغانستان: كمونيست توزومي وحشتلريدن خاطره لر

افغانستانده ايككي كونليك ماتم دوام ايتدي. 1970 ييللرنينگ آخريده كمونيست حكومت قربانلري يادي خاطره لندي.

عين ماتم مراسملريگه اوله راق 5000 نفر قربان بولگنلر و يا بيدرك كيتلرنينگ رويخطي چاپ ايتيلگني سبب بولگن.

اكثريت حكومت نينگ عنعنه دار و يا اسلامي مخالفتي و ياكه رقيب كمونيست گروه لري نينگ وكيللري بوليشگن.

بي بي سي افغان خذمتي محرير لطف الله لطيف پلچرخيده گي وحشتناك قماقخانه ده آمان چيققنلريدن بيري...

1978 ييل نينگ نوامبري ايدي. مين كابلده ساغليقني سقلش وزيرليگيده ايشلرديم. كونلردن بيركون همكسب لريم پستده كيملردير ميني سوره ياتگنيني ايتيب قالدي. اوچ رسمي ميني ايچكي وزيرليگيده سوراق قيليشماقچي ايكنلريني ايتيش اوچون كيلگن ايدي.

كونگليم بو يخشيليك بولمسليگي ممكنليگيني سيزيب تورردي. چونكه، مين فعال طلبه لردن ايديم. اوشه وقتده حكومت كوپ آدملرني حبس قيله ياتگني همده شبهه اويغاتگندي.

اما، مين هلي بو 13 آي دوام ايته ديگن وهمان ميني ترك ايتمه گن دهشت نينگ باشله نيشي ايكنيني بيلمسديم. ميني وزيرليككه آليب كيتيشدي وبيرهفته سوراق قيلديلر.

هرتون اولرساعت 12 ده يا 1 لرده كيليشر و بيريله ديگن سواللرهمه سيني "حكومت گه قرشي تيل بيريكتيرگنلريني تاني سن مي" ديگنده مسله گه جواب بولردي. "مخفي ييغينلرده قتنشگن مي سن، كيم رهبرلرينگ، اولرنينگ مقصدي نيمه؟" ديب سوره شردي. مين اولرنيمه حقيده گپيره ياتگنيني بيلمسديم. بيرتون اولربرق ايشلب چيقره ديگن كيچيك بيراسكونه آليب كيليشدي. بواسكونه نينگ بيرچيتيده چنگك بارايدي. ايكي سيميني مينينگ آياق برماقلريمگه اولشدي.

اولرمروت ني بوره شدي ومين برق قوتي ضربيدن قينه لرديم. اولرمروت ني بتترراق بوري شردي. هرتون شو تكرار بولردي. اولردن بيري مينگه: "قره، اگر، بيرارنرسه ديب يازيب بيرمه سنگ، هيچ قچان بوييردن چيقمه يسن"، ديب ايتدي. مين بيرنرسه لرتوقيشگه مجبوربولديم. هيچ كيمني عيبله مه ديم، البته... بيرهفته دن كيين ميني قييرگه ديرآليب كيتيشدي. مين آزاد بولديم ديب اويله گنديم، اما ميني پلچرخي قماقخانه سيگه آليب كيليشدي.

بيزني كتته بيرخانه گه قمشدي. 120 ته محبوس بارايدي.

همه ميزده بيرپرچه گينه ياتيش اوچون جاي بوليب، ايكيته كورپه بيريشگندي. طبيعي ييرده ياتر ايديك. بيزآياق چوزيش اوچون هم نوبت قيلرديك.

چونكه 120 نفرمحبوس بيرپيت نينگ اوزيده ياتالمس ويا يورالمس ايدي. كونيگه ايكي مرته حويلي گه آليب چيقيشردي. آقرسوو يوق ايدي. همه ياق افلاس وكير. بيركتته ايديشگه سوو قوييب قوييشگندي.

حاجتخانه لرهم تخته دن يسلگندي. يوزلب محبوسلر نوبتگه توريشردي. تنفس نينگ اوزي اوشه حاجتخانه لرگه نوبت كوتيشگه كيترايدي. آوقت ييب بولمه يديگن درجه ده اينيگن ايدي، اكثريت فقط قاتگن نان و چاي قناعت قيلردي. آوقت ييدينگيزكسل بولردينگيز...

عايلم ايسه بيليشمسدي قييرده ايكن ليگيمني... اولرهركوني قماقخانه گه قتنشگن و نهايت اوچ هفته دن كيين كييملر وآزگينه پول اوتكزيشگه موفق بولگنلر...

قريب تورت آي شونده ي اوتدي. كيين جمهور رييس اورين باسري حفيظ الله امين ريس جمهور نورمحمدتره كي ني اولديردي...

شوندن كيين قماقخانه ناظري اوزگردي. حيات بيزاوچون هم يخشي لنه باردي... تشقريگه كوپراق چيقه ريشدي. گزيته لر بيره باشلشدي. كيچگينه تلويزيون آليب كيليب بيريشدي.

اولربيزگه سياسي حيات يخشي لنگنيني كورستماقچي بوليشردي، اما تشقريدن دهشتلي خبرلركيلرايدي. كوپلب آدملرحبسگه آلينگن وقتل قيلينگني حقيده خبرلرايدي... كونلرنينگ بيريده 200 نفرمحبوسني آليب كيتيشدي و كوپ اوتمه ي بيزگه اوق آوازلري ايشيتيلدي.

ميش ميشلرگه كوره، اولرقماقخانه تشقريده گي بوش دله لرگه آليب چيقيب محبوسلرني آتيشگن ايكن... انچه اوتگندن كيين بوييردن قبرلر و جسدلرني تاپيشدي...

قماقخانه ايچيده ايسه... ايريم پيتلرمحبوسخانه قومانداني هربيرخانه گه كيريب چيقردي. مست- الس قوليده گي تياغيني ايشگه سالردي. اوبيزگه حكومت نينگ برچه دشمنلري قنده ي قيليب يوق قيليشي حقيده معروضه اوقييرايدي. بيزقرصك چليب توريشيميز كيره ك ايدي. قرصك چلمه گنلرني اوريشردي. بيركوني مينينگ يانيمده اوتيرگن محبوس اوخلب قالدي. بيچاره ني شونقه كلتكله دي كه، اونينگ قاوورغه لري، جغي سيندي... اوني آليب كيتيشدي وباشقه اوني بيزقيته ريب كورمه ديك.

1979 ييلده شورالر قشوني جمهور ريس ني اغدردي. كيچقرون ساعت سكيزلرده آتيشمه آوازلريني ايشيتديك. ساعت اون لرده عسكرلرقماقخانه ني اشغال قيليشدي.

بيز روس و افغان عسكرلريني كاريدارلرده يوگوريب يورگنيني كورديك. اولر بيزنينگ خانه لريميزگه كيليشدي و ايرته گه آزاد بوليشيميزني ايتيشدي.

ايرته سي كوني موترلرده بيزني شهرمركزيگه آليب كيليب آزاد قيليشدي. مين اوزجييه نيم بيلن بيرگه ليكده تكسي آليب اويگه كيلديم. اوهم مين بيلن بيرگه زندان بند ايتيلگندي.

اويگه كيله جك، جييه نيم آنمگه: "قره نگ، مين كيمني آليب كيلديم. ايتگنديم، سيزگه تاپيب كيله من ديب..."- ديدي.

* سیز و عایله ینگیز افغانستانده کی جنگلرده ضرر کورگن می؟ بو حقده فکرینگیز بولسه بیز بیلن قوییده کی فورم آرقه لی فکرینگیزنی اورتاقله شینگ