سیلاولر: افغانستان اوزبیکلری کیمنی ایسته شه دی؟

Image caption جنرال دوستم حاضرگچه قطار احتمالی نامزدلر بیلن مذاکره قیلگن.

اسلامی ملي جنبش حزبي رهبري جنرال عبدالرشید دوستم اولوسی جرگه رییسی عبدالروف ابراهیمی و باشقه بیرقطار ملت وکیللری و اوزبیک سیاستچیلری ابراهيمي نينگ اوييده ييغين اويوشتيريشگن.

ييغين اشتراک چیلری بوندن مقصد كيله سي جمهور رييسليك سيلاولريده بيرگه ليكده حركت قيليش ايكنينی تاكيدله گن.

اولوسی جرگه رییسی عبدالروف ابراهیمی وباشقه قطار اوزبیک سیاست چیلری وایریم ملت وکیللری هم جنرال دوستم سوزلریني معقول لشتيريب، بیرینچی اورین باسرلیکنی اوزبیک لردن تنله گن احتمالی نامزد ني حمايه ايتيشلريني بيلديريشگن.

بوندن آلدین هم شونده ی یغینلر جنرال دوستم اوییده اوتکزیلیب، هر بیر احتمالی نامزد کیله جک سیلاولرده بیرینچی اورین باسرلیکنی اوزبیکلردن تنله گن تقديرده، اسلامی جنبش حزبی داخل ایریم اوزبیک سیاستچیلری او شخص ني قوللب قوتلشيني قرار قبول قيلينگن ايدي.

بیراق حاضرگه قدرهم مذکور یغینلر نتیجه سیده بیرینچی اورین باسرلیک اوچون قنده ی بير نامزد بیلن رسمی کیلیشوو عملگه آشيريلمه گني ايتيله دي. حال بوکه جمهور رييسلیک سیلاو اوچون نامزد لرنی رویخط گه آلیش وقتي اوز نهایه سيگه ييته ياتگنيگه سناقلی کونلرقالگن.

یغینده اشتراک ایتگن اسلامی جنبش خربی سوزچیلریدن بشیر احمد تینج، احتمالی نامزدلر زلمی رسول، اشرف غنی احمدزی، جمهوررییس کرزی نينگ اكه سی قیوم کرزی، و سابق جهادی رهبرلریدن عبدالرب رسول سیاف بیلن نا رسمی اوچره شوولر بولیب اوته یاتگنینی تیلگه آلدی.

عین حالده، بو منبع گه کوره، اوزبیک سیاستچیلری بو اوچ کیشيدن بیرته سی بیلن كيليشيب آليشي ممكن.

خوف سیزلیک مسوولیت لرینی افغان کوچلریگه تاپشریش جریان مسوولی اشرف غنی احمدزی، اوزینی نامزد ایتیش اوچون لوازميدن استعفا بیردی. شونينگ ديك، اولوسي جرگه اعضاسي عبدالرب رسول سياف هم اوز نامزدليگي ني ايلگري سوريش مقصديده، پارلمان اعضاليگيدن استعفاگه چيققن.

خبرلرگه كوره، جمهور رييس كرزي نينگ مدافعه بوييچه مصلحتچيسي عبدالرحيم وردك هم لوازميدن استعفا بيرگن.

جمعیت حزبیگه علاقه دار داکتر عبدالله عبدالله، محمد محقق و انجینیر محمد خان اورین باسرلیگی بیلن کیله جک جمهور رییسلیک سیلاولری اوچون اوزنامزدلیگنی ایلگری سوردی.

ملی جبهه اعضالیگیده بولگن محمد محقق جنرال دوستم نینگ یقین اتفاقداشلریدن بیری ایدی، بیراق بو ایکی شخص انیق بیر نامزدني حمایه ایتیشگه كيليشه آلمه دي. شو مسله ملی جببهه نینگ مهم اعضالری اره سیده ایریم قرمه قرشیلیک لرگه هم سبب بولدی.

اوتگن دور جمهور رييسلیک سیلاولریده جنرال دوستم و محمد محقق حامدکرزی ني قوللب قوتلشگن ايدي.