جنرال دوستم دولت لوازمیدن استعفا بیردی

افغانستان قوراللي كوچلري اعلي قوماندانلیگی نینگ ارکان رییسی جنرال دوستم، اوتگن كون اشرف غني احمدزي نينگ جمهور رييسليك سيلاولريده معاوني صفتيده تنلنگني باعث، اوز لوازميدن استعفاگه چيقدي.

جنرال دوستم گه يقين شخصلردن نقيب الله فايق خبرني تصديقلب، دوستم افغانستان جمهور رييسي حامدكرزي بيلن اوچره شيب، اوز استعفا خطيني كرزي جنابلريگه تاپشيرگني ني ايتدي.

افغانستانده جمهور رييس مملكت كوچلري باش قومانداني بولگني گه قره مه ي، جنرال دوستم هم اوتگن ييللرده حربي كوچلر ارکان رییسی لوازميده ايش بجرردي.

اوتگن ييللرده جنرال دوستم افغانستان سياستي و خوفسيزليك لايحه لريده هيچ قنده ي عملي رول اوينه مه گن، اما او بو مملكت نينگ حربي اعلي درجه لي لوازميده ايدي.

فايق جنابلريگه كوره، جمهور رييس كرزي نينگ ايكينجي معاوني همده افغانستان اسلامي بيرليك حزبي رهبري محمد كريم خليلي، اشرف غني احمدزي و جنرال دوستم لر سيلاولر اتفاقي ني توزيشگن.

بو خبر ني محمد كريم خليلي مطبوعات اداره سي رييسي داكتر عباس بصير هم تصديقلب، اوچله رهبر سيلاولرده بيرگه ليكده حركت قيليشلري باره سيده كيليشيب آلگني ني ايتدي.

بصيرنينگ ايتيشيچه، اوتگن كون كيچقرون اوتكزيلگن ييغينده، اشرف غني احمدزي جمهور رييسليك نامزدي، جنرال دوستم بيرينچي معاون و سابق عدليه وزيري سرور دانش ايكينچي معاون صفتيده تنلنگن.

بوندن آلدين افغانستانده اون بيش سياسي حزب و گروه سيلاولرده بيرگه ليكده حركت قيليشلري اوچون سيلاولر اتفاقي ني توزيشگن ايدي. اما كوپ وقت اوتمه ي، تشكيل ايتيلگن اتفاق اعضالري اوز ارا پيدا بولگن جنجللرباعث، اورته دن كوته ريلدي.

بصيرجنابلري نينگ تاكيدلشيچه، بو تيم بوگون اوريخط دن اوتيش اوچون سيلاولر مستقل كميسيوني گه مراجعت ايتيشي ممكن.

عباس بصير، بو تيم سيلاولر اتفاقي صفتيده باشقه حزبلر و گروه لرنينگ حمايه سي ني جلب ايتيش گه حركت قيله دي دييدي.