جنرال دوستم افغانستان مردمیدن کیچیریم سورشگه تیار

Image caption جنرال دوستم شونينگ ديك، جنگ ملتلر ارا ايشانچ سيزليككه سبب بوليب، قوملر و قرينداشلرني بير بيراولريدن اجره تيب قوييشي ني ايتگن.

ملي جنبش رهبري همده اشرف غني احمدزي نينگ جمهور رييسليك بيرينچي معاوني جنرال عبدالرشيد دوستم كيله سي سيلاولر گه عايد بيانات نشر ايتيب، اوتيمشده روي بيرگن جنگلر مملكت تينچليگي ني برهم اوريب، خلق نينگ برادرليك و برابرليگيگه نقصان ييتكزگنليگي دن افسوس بيلديرگن. او بونده ي وضعيت دن چيقيش وكيله جكده قيته دن شونده ي ناخوش واقعه لر و برادرليك ني بوزه ديگن عمللر روي بيرمسليگي اوچون هوشيار بوليشني توصيه قيلگن. جنرال دوستم گه كوره، اوتگن ايككي دهه ايچيده مملكت قطار ناخوش واقعه لرگه گواه بوليب، قومي جنجللر، قطار آدملرنينگ قربان بوليشيگه سبب بولگن. او، تركي خلقلر قنچه كه قربان بوليشگن بولسه، باشقه ملتلر هم استبداد وعذاب گه رو په ره بوليشگن و بو درد همه اوچون مشترك ايكني ني تاكيدله گن. جنرال دوستم شونينگ ديك، جنگ ملتلر ارا ايشانچ سيزليككه سبب بوليب، قوملر و قرينداشلرني بير بيراولريدن اجره تيب قوييشي ني ايتگن. او مذكور واقعه لر قيته تكرار مسليگي و برادرليك مستحكملنيشي اوچون، كيريب كيله ياتگن جمهور رييسليك سيلاولرده قتنه شيش ني يگانه معقول يول ديب تاكيدله يدي. جنرال دوستم، سيلاولرده قتنه شيش بيلن، اوتگن ايكي دهه ده گي ايچكي اوروشلردن افسوس بيلديريب، اوروشده ضررلنگن لردن عذر سوره شيميز كيره ك ديگن. او، بوگون جمهور رييسليك سيلاولريده اشتراك ايتيب، مملكت تاريخي ده بنيادي ايشلرني بجريب، صلح و عدالت تامينلنيشي اوچون سعي و حركت قيليشيني تاكيدله گن. اونينگ ايتيشيچه، او خلققه خذمت قيليشگه تيار، و بار كوچ وقووتيني اهالي حياتي يخشي لنيشي و آسايشته ليك اوچون فايده لنيشي ممكنليگي ني ايتگن. او شونينگ ديك، افغانستان برچه نينگ آنه يورتي بوليب، موجود قاعده قانونلريگه حرمت قايل بوليش، همه نينگ وظيفه سي ايكني ني بيلديرگن.