افغانستان ده انسان حقلريگه عايد خلق ارا فلم فستيوالي اوتكزيلدي

بوهفته افغانستانده، فلم و سينما هفته سي دير. افغان و دنيا سينماچيلري افغانستان انسان حقلري گه عايد ايشلب چيقيلگن فلم نينگ ايكينچي خلق ارا فستيواليني برپا ايتگنلر.

كابل و باميانده بيش كونگه قدر دوام ايتديريليشي كوتيله ياتگن فسيتوالده، دنيا نينگ تورلي خيل منطقه لريده گي 65 فلم رقابت گه توشه دي.

افغانستانده فلم فستيواللري كوپ برپا ايتيلمه يدي، اما بو بار انسان حقلري فلمي فستيوالي تدبيركارلري افغانستانده گي موجود ايركينليكدن فايده لنيب، خارجي فلمچيلرگه هم زمينه يره تيب بيريشگن.

اوتگن هفته ده، فرانسه نينگ مدني مركزي، كابل پارك سينماسي، يوناما اداره سي و باميان ولايتي ده دنيا بويلب 65 فلم نمايش ايتيلدي.

افغانستان انسان حقلري فلمي خلق ارا ايكينچي فستيواليده، هر جايده نشر قيليشگه سزاوار كيلمه يديگن فلملر نمايش ايتيلدي. بو فليملرنينگ بعضي صحنه لريده افغان فلملريده آز اوچره يديگن ديالوگلر ايشله تيلگن.

بو فستيوالده حجتلي و انيميشن خارجي، ايچكي و طلبه ليك فلملر رقابتگه توشيشه دي.

فستيوالده نامزد قيلينگن فلملر بيرلشگن ملتلر تشكيلاتي نينگ كابلده گي اداره سي تالاريده و عمومي نمايش ايتيش اوچون ايسه، كابل پارك سينما سي و باميان ولايتيده هم كورستيله دي.

افغانستان انسان حقلري فستيواليده دنيا بويلب 380 فلم اوزيني نامزد قيلگن ايدي. اولردن فقطگينه 56 ته سي رقابتگه يول تاپيشگه موفق بوليشگن خلاص. بو فلم لر بيش سينماچيلر ونسان حقلري فعاللري تمانيدن نظارت ايتيليب، 8 ته سيني سيله شه دي.

افغانستان ده فلم وسينما ني حمايه ايته ديگنلر، بو فستيوال ني مملكت مدنيتي و صنعتي اوچون كته يوتوق ديه توصيفلشگن.

حاضرگي كونده، افغانستان نينگ سينماسي اوروشدن كيين قيته تيكلنه ياتگني گه قره مه ي، افغان سينماچيلري فلملري دنيا صنعتكارلري نينگ اثرلري قطاريده اورين ايگلله گني دن خرسندلر.

مذكور فستيوال نينگ مقصدلريدن بيري دنيا صنعتكارلري اينيقسه افغانستان قوشنيلري سينماچيلري اوچون زمينه يره تيب بيريش ايكني ايتيله دي.