عيال نينگ جمهور رييس بوليشيگه جمعيت قنده ي قره يدي؟

Image copyright BBC Pashto

افغانستان سياستيده دييرلي ناتنيش و يككه يگانه عيال نامزاد بولگن خديجه خانم غزنوي اكثريتي نهايتده قدرتلي سياستچي و سابق مجاهدين قوماندانلري بولگن اوتيزگه يقين ييريك رقيبلري بيلن جمهور رييسليك اوچون بيلشماقچي.

عين اورينده شوني هم تاكيدلش جايزكه، افغانستان نينگ بو يقين تآريخيده بونچه كوپ سانده گي نامزاد جمهور رييسليك اوچون بيللشمه گن.

ملتي هزاره بولگن خديجه خانم طالبان توزومي قوله تيلگن 2001 ييلدن بويان جمهور رييسليك سيلاولريده اشتراك ايته ياتگن تورتينچي عيال نامزاد بوله دي.

اما آره لريده مسعوده جلال كبي تنيقلي عياللر بولگني گه قره مه ي، اونگچه بولگن هيچ بير نامزد افغانستان جمهور رييسليك سيلاولريده پيچاققه ايلينگوديك نتيجه كورسته آليشمه گن.

محلي كوزه تووچيلر ايسه، افغانستان ده عيال كيشي نينگ قدرتگه كيليشيگه اساسآ اوچ عامل: خلق نينگ مينته ليگيتيتي، عرف عادت و عنعنه لر توسيقليك قيله ياتگنيني ايتيشه دي.

اما، اولرگه كوره، بولرنينگ برچه سيني اينگيب اوتيشگه قادر بولگن ايريم افغان عياللري هم بوليشسه، ده، اوتاريتيت و قدرت مسله سيده ايرككلرگه بس كيليشه آلمه يدي.

"افغانستان خلقي رهبر صفتيده يخشي، به آبرو، جدي، ايتگن گپي نينگ اوستيدن چيقه آله ديگن و دنيا بيلن يخشي علاقه باغله ي آله ديگن انسان ني ايسته يدي"، ـ دييدي توركيه دن سياسي تحليلچي عبدالسلام عصم.

خديجه خانم نينگ او نامزديني جمهور رييسليككه ايلگري سوريشي ايسه، افغانستانده عياللرگه اوته قتيق قولليگي بيلن تنيلگن طالبان حركتي كوچه ي ياتگن و خارجي قوشينلر آرتگه سفربرليك ني كوزله ياتگن بير پله ده كوزه تيلماقده.

افغانستانده طالبان توزومي قورتده بولگن 90 ـ ييللر آخرلريده خاتين ـ قيزلرنينگ فقط تعليم آليش و ايشلش ايركك همراه سيز، حتي، كوچه گه يالغيز اوزلري نينگ چيقيشلريگه هم ايز بيريلمه گن.

Мултимедиа ўйнаш бу қурилмада дастакланмайди

"عيال كيشي آتگه مينگنده"

Image copyright Getty

عين اورينده تاكيدلش جايز، بو يقين و اوزاق تآريخيده افغانستان ني عيال كيشي باشقرگن ايمس.

حكومت بوغينلريده عيال سياستچي كوته ريلگن اينگ يوقاري لوازم خاتين ـ قيزلر مسله لري بوييچه وزيرليك بوله دي.

افغانستان تآريخيده گي عيال كيشي باشقرگن ايلك حزبگه هم بار ـ يوغي اوتگن هفته اساس ستالينگندي.

اونينگ تشكيلاتچيسي بولگن فوزيه كوفي خانملري هم افغانستان تآريخيده بيرينچي بار پارلمان كميسيونلري معاوني درجه سيگه كوته ريلگن عيال سياستچي بوله دي.

افغانستان نينگ اوتيزدن آرتيق ولايت و تورت يوز گه يقين تومني حاكملري آره سيده هم عياللرنينگ ساني بار يوغي ايككيته.

انه شو عياللردن بيري هم شو ييل باشيده اوزبيكستان بيلن بيواسطه چيگره داش افغانستان شمالي ده گي قورتلي سياستچيلريدن بيري، اوزبيك جنرال عبدالرشيد دوستم توغيلگن تومنگه حاكم ييتيب تعين لنگندي.

45 ياشلي سايره شكيب سعادت افغانستان تآريخي ده و اوزبيكلر يشاوچي تومنده حاكمليك لوازميني ايگلله گن ايلك عيال كيشي بولگندي.

باشقه سي ايسه، ييللركه، يقين ـ يقينگچه اوزي نينگ اولكن تآريخي بودا هيكللري بيلن نام چيقرگن باميان ولايتيده حاكمليك قيله ياتگن حبيبه سرابي خانملري دير.

اما، افغانستان جايلشگن منطقه اوچون عيال دولت رهبرلري بيگانه ايمس.

دييليك، خلق نينگ مينته ليتيت، عرف عادت و عنعنه لري افغانستان ده گيسي بيلن بير خيل بولگن قوشني پاكستان ده حاضرده مرحوم بينظير بوتو خانم ايكي بار باش وزيرليك قيلگن.

قنچه لر عنعنه دارليگي باره سيده افغانستان دن هم اوتيب توشگن هندوستان ني ايسه، اوز وقتيده هندره گاندي خانملري باشقرگن.

قوشني قيرغيزستانده هم محلي قيرغيزلر و اوزبيكلر آره سيده قانلي نزاع لركيليب چيقيب، يوزلب انسان نينگ عمريگه ضامن بولگني ايتيلگن ييلي حاكميتگه عيال جمهور رييس ـ روزه اوتنباوه كيلگندي.

اوتنبايوه خانم اوشنده مركزي آسيا منطقه سيده دولت رهبرلري لوازميني ايگلله گن ايلك عيال سياستچي بولگندي.

كيله سي آيگه ريجه لنگن سيلاولرده تاجيكستان ده هم ايلك بار عيال نامزد جمهور رييسليك اوچون بيللشيب كورماقچي.

عين اورينده شوني هم تاكيدلب اوتيش حايز كه، 65 ياشلي انسان حقوقلري فعالي و جماعت اربابي آي نساء بابه نظريوه نينگ نامزدي منطقه ده گي يگانه ديني ـ اسلامي اويغانيش حزبي ايتكچيليك قيلاوچي مخالفتده گي تاجيكستان اصلاح طلب كوچلري اتفاقي تمانيدن ايلگري سوريلگن.

كيله سي ييلگي جمهور رييسليك سيلاولري عرفه سيده اوزبيكستان ده هم تونغيچ قيزي گلناره كيريموه جمهور رييس اسلام كريموف نينگ احتمالي ميراث خوارلريدن بيري صفتيده كوريله دي.

اما ايريم منطقه وي تحليلچيلر اونينگ رنگ به رنگ فعاليتيني نظرده توتيب، كتته سياستگه قنچه ليك لياقتي ايتيشيني سوال آستيگه آليشسه، باشقه لري عيال رهبرني خلق نينگ منيته ليتيتي قنچه ليك قبول قيليشيگه اعتبارني تارتيشه دي.

اوز اورنيده ايسله تيب اوتيش جايز، اوزبيكستان ني هم اوز زمانوي تآريخيده هليچه عيال كيشي باشقرگن ايمس.