فارياب ده قيته قوريش ايشلري توختب قالگن

فارياب ولايت اهاليسي ولايتده بوندن آلدين باشلنگن قيته قوريش لايحه لري توختب قالگني باره سيده شكايت قيليشگن. اولرمذكور لايحه دولت نينگ اعبتار سيزليگي باعث، توختب قالگني ني تاكيدلشگن.

مذكور لايحه ده بوندن ايكي ييل آلدين ميمنه شهري ده باشلنگن ايچيمليك سوو ييتكزيش جرياني ايشي نامعلوم سببلر باعث، توختب قاليب، تيگشلي شركتلرلايحه ني عملگه آشيرمسدن ايشلريني توخته تيش محل ني ترك ايتيشگنليكلري ايتيله دي. اولرنينگ بو عملي اهالي نينگ قتيق اعتراضيگه سبب بوليب، دولت ني ضعيفليكده عيبلشگن.

دولت ميمنه ده فقطگينه سوو ييتكزيش خذمتلري اوستيده كيته ياتگن لايحه لرني توختتمه گن، بلكه شونگه اوخشش اونلب عاموي لايحه لري چله ايشلب، شرطنامه باغلنگن شركت لر ايشني ترك ايتيشگن.

ميمنه شهري اهاليسي شهرده گي دم آليش جايلرنينگ كوركم لشتيريشده محلي دولت رسميلريني عيبداربيلشماقده. اولر عاموي لايحه لرنينگ توختب قالگني گه ولايتده كينگ ايزلديز آتگن پاره خورليك ني سبب قيليب كورستيشگن.

اوتگن اون ايكي ييل ايچيده افغانستان قيلينگن كته مقدارده گي خارجي ياردملر گه قره گنده، فارياب ولايتيده اساسي روشده قيته قوريش ايشلري عملگه آشيريلمه گن. افغانستان دولتي هر دايم مملكت بويلب آليب باريله ياتگن قيته قوريش و آبادانلشتيريش ايشلري زمانوي روشده عملگه آشيريليشيني تاكيدلب كيله ياتگني گه قره مه ي، فارياب ولايتيده حاضرگه قدر عملگه آَشيريلگن قيته قوريش ايشلري صفتسيز بوليب، يوللرنينگ زمانوي روشده قوريلمه گني، قيته دن بوزيليب كيتيشگه سبب بولگن. ولايت اهاليسي ايسه، مركزي دولت رسميلريني اوز ولايتلريگه نسبتآ اعتبار قره تمه ياتگني گه عيبلشگن.

جمهور رييسلیک سیلاولري كيريب كيريب كيله ياتگني و 2014 ييلدن سونگ، خارجي قشونلر افغانستان ني ترك ايتيشي مسله سي، قيته قوريش و آبادانلشتيريش لايحه لرده كته تاثير اوتگن. فاریاب ولایتی نینگ حاکمی محمدالله بتاش هم 2014 ييل يقينلشيب كيله ياتگني ني پروژه لرنینگ توخته ب قالیشيگه سبب بوله ياتگني ني تاكيدله گن.اونگه كوره، افغانستان دولتي هم شو مسله دن تاثيرلنيب، محليده گي حاكميتلرگه ييترلي درجه ده قيته قوريش لايحه لري عملگه آشيريليشي اوچون، امكانيت و خرجت اجره تمه ي قالگن.

حاضرگي كونده فارياب ولايتيده 8 تومن و 130 مكتب بنا سيز بوليب، دولت هنوزگچه بو بنالرني قوريشده هيچ قنده ي بشارت برمه گن.

فارياب افغانستان شماليده گي مهم ولايتلردن بيري سنه له دي، اما سونگي پيتلرده بو ولايتده نابرقرارليكلر اوج آليب، قوراللي مخالفلر ولايت نينگ بعضي تومنلريده كينگ فعاليت قيله ياتگني حقيده خبرلر ييتيب كيلمقاده.

ايريم كوزه تووچيلر، فارياب ده گي عاموي لايحه لردن بيرقسمي نينگ توختب قالگني، موجود تينچسيزليكلرگه بيواسط باغليق ايكني ني ايتيشماقده.