كرزي بير نيچه كيليشوونامه گه قول قوييش اوچون تاجيكستانگه سفر قيلدي

حامدكرزي تاجيكستان جمهور رييسي نينگ رسمي دعوتي بيلن دوشنبه گه سفر قيلگن

افغانستان جمهور رييسي حامدكرزي، كابل و دوشنبه ارا همكارليكر و علاقه لرني مستحكملش مقصديده تاجيكستانگه سفر قيلگن.

افغانستان جمهور رييسليك مطبوعات اداره سي تمانيدن نشر ايتيلگن بياناتده، حامدكرزي تاجيكستان رهبري امام علي رحمنوف نينگ رسمي چقيريغي اساسيده ايكي كون تاجيكستانده قاليشي ممكنليگي ايتيلگن.

عين حالده، مملكت تشقي ايشلروزيرليگي سوزچيسي جانان موسي زي بي بي سيگه، بو سفر ده كرزي جنابلري تاجيكستان ليك همكسبي بيلن اوچته همكارليك حجت ني امضالشيني ايتگن.

افغانستان تشقي ايشلروزيرليگي سوزچيسيگه كوره، كرزي جنابلري تاجيكستان بيلن ماين تازه لش و بيمه بوليملريده ايكي كيليشوونامه ني امضاله يدي و بوندن تشقري ايكله مملكت فقرالري نينگ باردي كيلدي سي اوچون قوله يليك يره تيليشي محاكمه ايتيله دي.

افغان رسميلري بو كيليشوونامه لر باره سيده كوپراق تفصيلات بيريشمه گن، اما تشقي ايشلروزيرليگي ايكله مملكت رهبرلري اوچره شوو سونگيده قوشمه اعلاميه نشر ايتيشلري ممكنليگيني ايتگن.

اوتميشده افغانستان و تاجيكستان محبوسلرني قيته ريب بيريشده كيليشوونامه امضاله گن ايدي.

حامدكرزي ني بو سفر ده ملي خوفسيزليك مصلحتچيسي دادفر رنگين سپنتا، ماليه وزيري عمر زاخيلوال، فوايد عامه وزيري نجيب الله اوژن، مخدرماده لرگه قرشي وزيري ضراراحمد مقبل و بير نيچه يوقاري مرتبه لي رسمي يولداشليك قيله دي.

افغانستان تشقي ايشلروزيرليگي رسميلريگه كوره، اوزي نينگ اون بير ييلليك حكومتيده ييتي مرتبه تاجيكستان گه سفر قيلگن.

افغانستان و تاجيكستان 1200 كيلومتر دن آرتيق قوشمه چيگره گه ايگه .