بويوك ايپك يولي دردانه سي ـ قديم بلخ خزينه لري

Image caption 15 عصرگه تيگيشلي خوجه پارسا مسجديني تعميرلش ايشلري

افغانستان شماليده گي بلخ ولايتيده دنياده گي اينگ مهم تآريخي اهميتگه مالك نقطه لر موجود. قديمي بلخ ايسه، "شهرلر آنه سي" ديب تنيلگن.

بي بي سي مخبري ليوني اودونيل ايلك بار بلخگه اون ييلدن آرتيقراق وقت مقدم سفر قيلگندي. بو گل مخبريميز شهرنينگ قديمي خزينه لريني كشف قيليشگه اورينه ياتگن ارخيالاگ لربيلن بيرگه بارگن.

افغانستان شماليده ايسه ياتگن ايسيق شمال چنگ و توزان ني آسمانگه كوته رردي. عياللر بورقه سي شمالده ماوي تولقين ديك موجلنه دي. 40 درجه جزيره مه ده قم تيپه لر آشه هيده ب اوتيله ياتگن قاره ايچكيلرهم تينكه سي قوريگن كورينه دي.

اوشبو منظره لر ـ بير پيتلر كوچمنچيلر و اوتراق اهالي، سركرده لر و سياحلر، بارينگ كه، مسحي لرني ـ ده ايتكلب اوتگن كروان يوللري بولگن. اولر اوزلريدن كوپلب سير ـ صناعتلرني قالديريشگن. ارخيالوگيه ايسه، هلي همان بو جومباقلرني ايچيشگه اورينيشه دي.

منطقه آسيانينگ 4،000 ييلليك سياسي، اقتصادي، اجتماعي همده ديني تآريخي قاق مركزي حسابلنردي.

مين باختريه تيكيستليكلريدن 2001 ييل اوتگنديم. نيويارك و واشينگتنگه قرشي 11 سپتمبر هجوملري آرتيدن بيريتانيا و امريكه كوچلري طالبان ني ييرو كوكدن نشانگه آله ياتگن پيت مين اوزبيكستاندن افغانستان گه آمودريا آرقه لي كيسيب اوتگنديم.

Image caption مناره 12 عصرده بنياد ايتيلگن

12 ييل اوتيب، ينه دنيا نينگ اينگ قديمي، اينگ نادر و اينگ يويوك تآريخي ني اوزيده جمعلنگن حدودني زيارت قيليش اوچون كيلديم. بو گلگي همراه لريم افغان و فرانسه قديم شناسلري...

بو منظره لر نه فقط افغانستان نينگ اوتميشي، بلكه هندوستان و چين و اوندن نري ياقده گي سرحدلر انساني تمدني بيشيگي هم دير.

باختر تيكيستليكلريده افغانستان نينگ سيرـ صناعتلرگه توله تآريخي خزينه لري بيكيلگن.

اوشبو صحرالردن بويوك الكسندر(اسكندرزولقرنين) او قوشنيلريني ايلديريب اوتگن، بلخ پادشاهي اوكسيرت ني اولديريب، اونينگ گوزه ل قيزي رخشانك(روكسانه)گه اويلنگن.

1.500 ييل كيينراق ايسه، چينگيزخان بو يورتگه دهشت سالگن، شهرلركوليني كوككه ساورگن.

زردشتليك ديني اساسچيسي زردشت هم 3.500 ييل مقدم شو ييرده يشب، احتمال كه، حياتدن كوز يومگن.

اولوغ علامه جلال الدين رومي 13 عصرده بلخ ده تولد تاپگن.

ينگي تيريلگن پخته لر آرتيلگن تويه لر كروانلري قوريب ققشه گن چوللرني كيسيب اوتيب، اونومدار بلخ واخه سيگه قره ب يوريشگن.

فرانسه ليك ارخيالوگلر ييريك آلتي بورچكلي قلعه ني اوره ب تورگن ديوارلردن نمونه لر آليشماقده. قلعه نينگ شكل و شمايلي فقط صنع يولداش آرقه لي آلينگن صورتلرده كورينه دي. اوشبو انشعات هم حمايه و هم سوو اوچون استراتيژيك مهم حسابلنگن.

اولر ميتل ني چه ني توپراققه تولديريش اوچون قلعه پايديواريني ينه ده چوقوراق كاولشه دي. شونده پاريس ده گي عالملر اوشبو نمونه لرگه قره ب بينا تآريخي ني انيقلشگه اورينيب كوريشلري ممكن. ظاهر اولر 2.500 ييللرني تخمين قيليشماقده.

يقين اطرافده جايلشگن دولت آباد ـ زدينده گي كيچگينه مهمان دوست قيشلاقچه. اوييرده طالبان فعال بولگني اوچون فقط قوراللي پوليس همراه ليگي ده باريشگه موفق بولديك.

مين كمره م ني كوته ريشيم بيلن قودوق باشيده گي رنگ به رنگ رومال اوره گن قيزه لاقلر چينكيره ب قاچيشه دي.

افغانچه اوست ـ باش كيين سلله لي ايرككلر ايسه، سايه دن بيزني قرشيلش اوچون چيقيب كيليشه دي.

كوككه قره ي من، ميني غبارسيز آسمان، قوياشده پيشگن گلدان تيكلنگن مناره نينگ اولوغ وارليگي حيرتگه ساله دي.

Image caption توققيز گومبز مسجدي هم قيته تعميرلنماقده

قديمي بلخ شهري

بلخ تآريخ ده ام البلاد(شهرلر آنه سي) ديب يوريتيلگن يونانلر باختره ديب اته گنلر.

7ـ 12 عصرلرده بلخ دين، علم ـ فن و سودا مركزيگه ايلنگن. هندوستان و چين ني، شرق بيلن غرب ني باغلب تورگن " بويوك ايپك يولي" ده گي ييريك سودا شهرلريدن بيريگه حسابلنگن.

1220 ييللر چينگيزخان طرفيدن ويران ايتيلگن بير عصردن اوتيب ايسه، امير تيمور سلطنتي تركيبيگه كيرگن 13 عصرده وينيسه ليك سوداگر و سياحتچي ماركوپلو بلخ ني " بويوك شهر" ديه تعريفله گندي.

12عصرده بنياد ايتيلگن، چينگيزخان و اونينگ مغول باسقينچيلريدن، اوشندن بيري دنيا نينگ اوشبو نقطه سيگه تينم سيز كيليب ـ كيتگنلر زيان ـ زحمتيدن آمان قالگن مناره همان نامسيز.

چشمه ي شفا واخه سيده گي ييريك، سندانگه اوخشه تيب يونيلگن آق چقماق تاش شهرده زردشت ليككه اعتقاد قيلينگني يگانه دليلي دير.

محراب نينگ تيكيستلنگن اوست قسمي چيراق ياغي اوچون قودوقچه وظيفه سيني اونته گن. اوشبو يالكين ني ايسه، بوتون وادي دن توريب كوريش ممكن بولگن.

فرانسه ليك قديم شناسلري سندان بويوك الكسندير رخشه نككه اويلگن پيتي هم شو ييرده بولگن ميكن ـ يوقليگيگه قيزيقه ديلر.

فرانسه ليك لر بلخده قريب 100 ييلدن بيري ايزله نيشلر آليب باريشه دي. اما بو فعاليت اوروشلر و باسقينلر طفيلي بولينيب تورگن.

قه زيش ايشلري 1990 ييللر آخرلريده، تآريخ فقط 7 عصردن اسلام پيدا بوليشي بيلن باشلنگن ديب ايشانوچي طالبان قدرتگه كيليشي بيلن هم توخته تيلگندي.

اصليده افغانستانده اسلام بودايي ليك اورنيده برپا ايتيلگن. تآريخ ني نظر پسند قيلمسليگي ني نمايش ايتگن طالبان 2001 ييل باميان ده گي بودا هيكللريني ويران قيلدي.

بوگون ارخيالوگلر ترقيات و فلسفه ني دنيا نينگ تورت تمانيگه ترقه تيشده افغانستان نينگ رولي مينگلب ييللرگه باريب تقه ليشي ني تصديقله ماقده لر.

Image caption مينه بو چقماق تاش آتش پرستلرگه تيگيشلي بولگني تخمين قيلينه دي

اولر نظريده، اوتميش نينگ بويوك كيله جك اوچون نمونه بوليشي كيره ك.

اصل بلخ تآريخي ده گي اينگ قديمي بويوك شهرلردن بيري بولگن.

بوگون اوندن قالگني ـ چنگ ـ توزانلي دله لر، مشقتلي قه زيش ايشلريدن سونگ بوي كورستيب قالگن اولوغ وار ديوارلر... 7 ييل ايچيده يايديوارلرنينگ 20 مترليك قسميني قه زيشگه موفق بوليشگن.

ديوارلر آشه ايسه، زمانوي قيشلاق حويلي لري... كير يايي له ديگن دارلر، ايتلريني ته قيب كيله ياتگن باله كي لر، اره به تارتيب باره ياتگن ايشكلر، چنگ اويورمه لريني كوككه كوته ره ياتگن ايسسيق شمال...

كيينگي حادثه لر قي تمانگه اوزگرمه سين، اوروشلر توگب، كيله سي ييل خارج كوچلري چيقيب كيتگنيدن سونگ، بلخ ينه افغانستان نينگ اوزاق ييلليك تآريخي قهريگه سينيب كيتيشيگه شبهه يوق.