کابلده یوزبیرگن پارتلشده بیر کیشی هلاک و بیش عسکر یره لندی

افغانستان مدافعه وزیرلیگیگه کوره، پایتخت کابل نینگ شرقی حدودیده یول چیککه سیگه جایلشتیریلگن ماین پارتلش نتیجه سیده، بیر تینچ فقرا هلاک و ملی اردوی کوچلریدن بیش کیشی یره لنگن.

افغانستان ملی مدافعه وزیرلیگی تمانیدن نشر ایتیلگن خبرنامه ده مذکور حادثه کابل شهری نینگ " ارزان قیمت" دیب اتلگن منطقه سیده یوزبیرگنی ایتیلگن.

عینی حالده، مدافعه وزیرلیک سوزچیسی ظاهر عظیمی تویتر صحیفه سیده بوخصوصده معلومات بیریب حادثه بوگون ایرته لب ساعت 7 اطرافیده یوزبیرگنینی ایتگن همده یره لنگن لر افغانستان هوای کوچ عسکرلریدن بولگنینی معلوم قیلگن.

افغان مقاملری یول چیککه سیگه اورنه تیلگن ماین دن اصلی مقصد کیم بولگنی باره سیده حاضرگه قدرهم معلومات بیریشمه گن.

ارزان قیمت منطقه سی کابل – جلال آباد شاه یولیده جایلشگن، بو منطقه اطرافیده بیرقطار حربی مرکزلر هم موجود.

طالبان عصیانچیلری اوشبو پارتلش مسوولیتینی اوزبوینیگه آلیب آلتی عسکر هلاک بولگنینی ادعا قیلگن.