كرزي لندن ده بيريتانيا و پاكستان رهبرلري بيلن اوچره شه دي

افغانستان جمهور رييسي حامدكرزي نينگ اكتوبر آيي آخرلريده افغانستان، پاكستان وبيريتانيا ممكتلري بيلن اوچ تمانلمه مذاكره لرنينگ تورتينچي دوريده اشتراك ايتيش مقصديده بيريتانيا گه سفرقيليشي كوتيله دي.

افغانستان جمهور رييسليك اداره سي سوزچيسي ايمل فيضي، كرزي جنابلري بيريتانيا گه قيله ديگن تورت كونليك سفري جريانيده اوچ تمانمله مذاكره لرده قتنه شيش دن تشقري، اسلام دنيا سي نينگ اقتصادي كنفرانسيده هم اشتراك ايتيشي ممكنليگي ني ايتگن.

بو اوچ تمانلمه ييغينده، پاكستان باش وزيري نوازشريف و بيريتانيا باش وزيري ديويد كمرون هم اشتراك ايتيشي ممكن.

ايمل فيضي:" بو ييغين هم، آلدين دن بيريتانيا حكومتي اينيقسه باش وزيري نينگ تشبثي بيلن آلينگن اوچ تمانلمه ييغين دواميده اوتكزيله دي. ييغينده آلدينگي مسله لرديك افغانستان وپاكستان ارا ايكي تمانلمه علاقه لر بحثگه آلينه دي. تورلي ساحه لرده گي همكارليكلر اينيقسه، تيروزيمگه قرشي كوره ش و ايكله مملكت ارا همكارليكلرني كينگه يتيريش مسله سي".

افغانستان دولتي نينگ تاكيدلشيچه، پاكستان افغانستانده صلح تامينلنيشي اوچون مهم رول اوينه آليشي ممكن.

پاكستان سابق جمهور رييسي آصف علي زرداري اشتراكيده لندن ده بوندن توقيز آي مقدم آلينگن ييغينده، افغانستان وپاكستان آلتي آيگچه افغانستانده صلح بوتونلي تامينلنيشي باره سيده وعده قيليشگن ايدي.

شوبيلن بيرگه بو ييل جون آييده قطر ده طالبان نماينده ليگي هم آچيلدي، اما افغانستان دولتي طالبان نينگ بيراغي و لوجه سي گه اعتراضي بيلديرگنيدن سونگ، بو نماينده ليك ياپيلدي.