ملت وكيللري نينگ مجلسده حاضر بولمه ي ياتگن، مهم قانونلرتصديقلنمه ي قاليشيگه سبب بولگن

Image caption وكيللردن بيري ، اكثر كونلرده نماينده لردن فقطگينه 20 فايزي مجلسگه حاضر بوله ياتگني ني معلوم قيلدي.

اولوسي ده خلق وكيللري دن بيرقطاري نينگ حاضر بولمه ي ياتگني، بيرتعداد قانونلرنينگ تصديق دن اوتمه ي قاليشيگه سبب بولگن.

ملت وكيللريدن بيرتعداديگه كوره، اولرنينگ همكارلري اكثرآ تجارت و شخصي ايشلريني بجريش بيلن بند.

عين حالده، سيلاولر يقينلنيشي بيلن وكيللردن بير تعدادي سيلاولر ايشلريگه مشغول بوله ياتگني ايتيله دي

اولوسي جرگه ده آلينه ياتگن ييغينلرنينگ نتيجه سيز قاله ياتگني، نه فقط اهالي و حكومت رسميلريني اذيتلنتيرگن بلكه، ايكله مجلسده گي وكيللردن بيرقطارنينگ شكايتيگه هم سبب بولگن.

وكيللردن بيري ، اكثر كونلرده نماينده لردن فقطگينه 20 فايزي مجلسگه حاضر بوله ياتگني ني معلوم قيلدي.

بو فقط اولوسي جرگه ده ايمس، بلكه سنا مجلسي ده هم خوددي شو معما موجود.

سناتورلرگه كوره، قطار قانونلر تصديقلنيش اوچون تياربولگن، اما مشرانو جرگه ده نصاب تكميل بولمه گني، قانونلرنينگ تصديقدن اوتمه ي قاليشيگه سبب بولگني ني تاكيدلشماقده.

ملي كينگش بو ايكي اعضاسيگه كوره، اولرنينگ همكارلريدن بيرتعدادي انده سنده كيليب توريشه دي، اما باشقه بير قطاري دايمي شكل ده يا هم ييليگه بير ايكي مراتبه مجلسگه كيليشه دي خلاص.

پارلمان ده گي وكيللردن اكثريتي ايكله مجلس نينگ اداري هييتي ني بو حقده اعتبارسيزليكده عيبلب، موضوع باره سيده جدي يانده شمه ياتگني ني تنقيد قيليشه دي.

ايكله مجلس اداري هييتي نينگ بو ادعا توغريسيده گي فكريني اورگه نيشگه موفق بولمه ديك.

اما كوپچيليك وكيللر، اداري هييت حاضر بولمه ي ياتگن وكيللرنينگ صلاحيتي بيكار قيلينيشي كيره كليگي ني تاكيدله ماقده لر.

ملت وكيللري نينگ ايتيشيچه، مجلسده حاضر بولمه ي ياتگني مهم قانون لر آيلردن بيري تصديق دن اوتمه ي قالگن.

اوتگن كون سيلاولر مسقتل كميسيوني بيرتعداد كميشنرلري، سيلاولر قانوني تصديقلنمه ي ياتگني، سيلاو ايشلريده معمالر پيدا بوليشيگه سبب بولگني ني ايتيشگن.

بو قانون بيرييلدن آرتيق پارلمانده تصديقلنمه ي قالگن.

حاضر جمهور رييسليك و ولايت كينگش سيلاولري يقين لشه ياتگن بيرپيتده، ملت وكيللريدن بيرقطاري نامزدلرنينگ سيلاولر كمپاينلريده اشتراك ايتيش اوچون، كوپ وقت دن بيري مجلسگه حاضر بوليشمه گن.