افغانستان 1393 ييل ملي بودجه لايحه سنامجلسيگه يوباريلدي

Image caption افغانستان ماليه وزيرليگي مملكت نينگ كيله سي ييل مالي بودجه لايحه سي ني مشرانو جرگه تاپشيرگن.

افغانستان ماليه وزيرليگي مملكت نينگ كيله سي ييل مالي بودجه لايحه سي ني مشرانو جرگه تاپشيرگن. ماليه وزيري حضرت عمر زاحيلوال بوگون مشرانو جرگه نينگ عمومي ييغينيده 1393 ييل بودجه سي 7 بوتون اوندن 9 ميليارد دالر ايكني ني معلوم قيلدي.

اوتگن ييللرده ولايتلر اوچون اجره تيلگن بودجه لرنينگ تينگسيزليگي باره سيده تنقيدلر پيدا بولگن ايدي.

افغانستان ماليه وزيري 1393 ييل رواجلنتيريش و عادي بودجه سي بو ييل گه قره گنده 27 فايز گه آشيريلگني ني معلوم قيلدي. او، اوتگن ييللر كبي جنجل پيدا بولمسليگي اوچون، حاضرگي تيارلنگن بودجه ده باركمچيليكلر كوريب چيقيلگني ني تاكيدله دي.

عين حالده، سنا مجلسي اعضاسي عزيزالله الفتي، ماليه وزيرليگي طرفيدن مجلس گه تاپشيريلگن 93 ييل بودجه لايحه سي تيكشيروودن اوتگن دن سونگ، ماليه وزيري احتمالي كمچيليكلر باره سيده مجلسگه ايضاح بيريشگه چقيريليشي ني ممكنليگي ني تاكيدله ماقده.

الفتي جنابلري گه كوره، مجلسگه يوباريلگن بودجه ده ولايتلر اوچون قنچه رواجلنتيريش بودجه اجره تيلگني انيق ايمس، بو مسله سنا مجلسي اعضالري تورت بيش كون ايچيده ماليه وزيرليگي تمانيدن تيارلنگن ملي بودجه لايحه سي ني كوريب چيقيشي ممكن.

جاري 92 ييل ملي بودجه سي افغانستان پارلماني تمانيدن ايكي مراتبه رد ايتيلگندي.

حاضرگي بودجه لايحه سي سنا مجلسي نينگ تصديقي دن اوتگن دن سونگ، اولوسي جرگه گه يوباريليشي ممكن.

ملت وكيللري، 92 ييل بودجه لايحه سي ني، ولايتلر اوچون اجره تيلگن بودجه نينگ تينگ سيزليگي و جمهوررييسليك اداره سي خره جتي اوچون 80 ميليون دالر اجره تيلگني گه قرشيليك كورستيشگندي.

افغانستان دولتي اوچينچي بار لايحه ده اوزگريش كيريتيب، پارلمانگه يوباردي. نهايت ملت وكيللري كوپچيليك آواز بيلن 92 ييل بودجه سيني تصديقدن اوتكزيشدي.

نماينده لرنينگ بودجه ني بيرنيچه بار رد ايتگنليگي، اولرنينگ دولت دن امتياز آليشيده عيبلنيشيگه سبب بولگندي.

اما افغانستان پارلماني كيله سي ييل بودجه سيده قنده ي كمچيليكلر ني اوچره تيشي، حاضر گچه معلوم ايمس.

افغانستان نينگ 92 ييل ده گي بودجه سي 3 يوزو 50 ميليارد افغاني دن آرتيق بوليب، ايكي مراتبه رد ايتيلگني دن سونگ، پارلمان تمانيدن تصديقلندي.

1392 ييل بودجه سيده پارلمان اعضالري كته لايحه لر جمله دن برق توغانلري قوريليشي ني طلب قيليشگندي.