ايلك بار پايتخت كابلده اوزبيكستان اسلامي حركتي اعضالري قولگه آليندي

Image copyright AP

افغانستان ليك خوفسيزليك مسوللريگه كوره، حبسگه آلينگن بوايككي شخص كابلده تيرورچيليك عملياتي اويوشتيريش ريجه سيده بوليشگن.

اولرنينگ سوزلريدن عيان بوليشيچه، فهيم وعبادالله پاكستانده 40 كونليك تيارگرليك دن اوتيب، عين شو مقصدده افغانستان پايتختيگه كيليشگن.

حبسگه آلينگن ايكاوولان بوندن اول افغانستان نينگ قوشني تاجيكستان بيلن چيگره داش بدخشان ولايتيده كيچگن سونگگي ققشتقيچ جنگ لرده هم فعال اشتراك ايتگن ليكلريگه اقرار بوليشگن.

اما، خبرلردن عيان بوليشيچه، اولر، حتي، سونگگي ييللرده اوزبيكستان اسلامي حركتي قيته فعاللشگني ايتيله ياتگن افغانستان شماليدن هم ايمسلر.

هر ايككي محبوس افغانستان نينگ پايتختي كابلگه يقين مركزي ميدان وردك وپروان ولايتلريدن بوليشگن.

اولرنينگ سوزلريگه كوره، اوزبيكستان اسلامي حركتي فعال لري نينگ تشويقاتي بيلن اونگه اعضا بوليب كيريشگن.

منطقوي كوزه توچيلرهم سونگگي ايككي – اوچ ييل ايچيده حركت نينگ افغانستانده گي فعاليتي كينگه ييب باره ياتگنيني تاكيدله شه دي.

اوزبيكستان اسلامي حركتي امريكا باشچيليگيده گي حربي اعتراف كوچلري نينگ 2001 ييلگي حربي عملياتلري آرتيدن پاكستاندن باش پناه تاپيشگندي.

آخرگي ييللرده ايسه، افغانستان نينگ مركزي آسيا بيلن چيگره لريگه يقين شمالي منطقه لريده قيته فعال لشيشيگه موفق بولگني كوزه تيله ياتگندي.

محلي مسوللر يقينده منطقه ده چوقور ايلديزآتگن ايشسيزليك وناچارليك باعث، افغان ياشلري آره سيده حركت صفلريگه اوتيب كيته ياتگنلرساني كيسكين آرتيب باره ياتگنيدن هم خواطر اظهار ايتيشگندي.

كابلده گي سونگي حادثه ايسه، اوزبيكستان اسلامي حركتي نينگ حاضرگه كيليب، حتي كه پايتخت كابلگه هم كيريب باره ياتگنيگه دلالت قيله دي.

حركت نينگ حاضر ينه مركزي آسيا قاليب، قفقاز منطقه سيدن هم ينگي جنگريلر ياللشگه اورينه ياتگني حقيده خبرلر بار.

اوتگن يقين ييللر ايچيده محلي و خلق ارا اتفاق كوچلري تمانيدن افغانستان نينگ قطار شمالي ولايتلريده حركت نينگ عادي اعضالري قاليب، قطار يوقاري مرتبه لي قوماندانلري هم قولگه آلينيشگن.

اما شونگه كونگه قدر، حبسگه آلينگن شخصلرنينگ قه يرده سقله نيشه ياتگني ياكه اولرنينگ اوستيلريدن بيرار بير محكمه جرياني بوليب، اوتگن مي، يوقليگي باره سيده دييرلي خبرلر يوق.

منطقه ده گي مخبرلريميزگه كوره، اولر اكتريت حاللريده عفو ايتيب، قوييب يوباريليشه دي.

تحليلچيلرگه كوره، اوزبيكستان اسلامي حركتي اوزبيكستان گه هجوم قيليش و رژيم بيلن كوره شيش مقصديدن واز كيچمه گن.

اما اولرنينگ تاكيدلشلريچه، حركت نينگ رژيم ني ييقيتيش وقووتي موجود ايمس و اوزبيكستان اوچون كوپراق بي بضاعتليك عالمي بوليب، كيله ويره دي.