افغانستان تآمينات قانونيده اوزگريش كيريتيله دي

افغانستان ماليه وزيرليگي، تآمينات قانوني نظرده توتيلمه گني، بودجه صرفلنمه گنليگي نينگ مهم دليللريدن حسابلنه دي ديگن.

اوتگن تامينات قانونيگه اوزگريش كيريتيش مقصديده تامينات ملي ييغيني بوليب اوتدي.

افغانستان حكومتي مذكور قانونده گي كمچيليكلرني برطرف ايتيش و ياردملرنينگ صرفلنيشي ني تيزلشتيريشده سعي و حركت قيلماقده.

ماليه وزيري عمر زاخيلوال نينگ ايتيشيچه، حاضرگي كونده تامينات قانوني اساسي روشده عملي قيلينمه يدي و بومسله لايحه لرنينگ عملگه آشيشي مدتي اوزاقلشيب، خرجت كوپراق صرفلنيشيگه سبب بولگن.

اوتگن كونگي ييغينده افغانستان وزيرليكلري نماينده لري يانيده خارجي ياردم بيرووچي مملكتلر وتشكيلاتلرنينگ وكيللري هم اشتراك ايتيشگن.

ماليه وزيري:" تامينات جرياني ده اره لشووي موجود، بو اره لشوو اداره ايچكريسيده و هم تشقريسيده، اداره مسووللري صلاحيتگه ايگه ايمسلر. بير قطار شخصلر اره لشيب، جرياني ني سسته يتيريشگن.مثال اوچون ايكي آيليك لايحه بير ييلگه چوزيله دي. حاضر افغانستان ده عملگه آشيريله ياتگن لايحه لر منطقه ده گي اينگ يوقاري نرخلي لايحه حسابلنه دي".

زاخيلوال، موافقلشتيريش و رواجلنتيريش لايحه لرني تيزلشتيريش مقصديده، تامينات قانونيده اوزگريش كيريتيليشي ضرورليگي ني ايتيب، قانون دنيا معيارلريگه ماس قيلينيب، تيارلنيشي ني تاكيدله گن.

عادي و رواجلنتيريش بودجه نينگ بوتونلي صرفلنمه گني، هر ييلي حكومت نينگ معما گه روپه ره قيلگن.

عين حالده، عدليه وزيرليگي معاوني سيد يوسف حليم، اجرا ايتيش پيتيده تامينات قانونيده قيينچيليك موجودليگي ني ايتگن.

اونگه كوره، حاضر بو قانونده اوزگريش كيريتيش ايشي دوام ايتماقده.

حليم جنابلري نينگ ايتيشيچه، قانون ده كريتيله ديگن اوزگريشگه بنآ، والي لر و مركزي اداره لر رييسلري لايحه لرنينگ تاميناتي بوليميده وزيرلرنينگ صلاحيتيگه برابر صلاحيت گه ايگه بوليشي ممكن.

اونگه كوره، اوزگريش كيريتيلگن دن سونگ، بو قانون ملي كينگش گه يوباريليشي ممكن.

كته قيته قوريش شرطنامه لر امضالنيشي و رواجلنتيريش لايحه لرتفصيلاتي كيريتيلگن عاموي تامينات قانوني، 2005 ييل نينگ اكتوبر آييده تصديقلنگن.