بيريتانيا افغانستانده 20 مينگ جريب ييرده حربي تعليم مركز قوردي

افغانستان جمهور رييسي حامدكرزي، بيريتانيا كوچلري افغان منصبدارلري نينگ تيارگرليكدن اوتكزيشده افغانستان قوشني لري كبي حصه قوشيب، بو مملكت گه كوچ جونتگني ني ايتگن. كرزي بو سوزني افغانستان ملي اردو كوچلري و منصبدارلري اوچون قوريلگن تعليم مركزي نينگ آچيليش مراسميده تيلگه آلگن.

بو مراسمده بيريتانيا مدافعه وزيري فيليپ هامن ينگي تاسيس ايتيلگن حربي اكادمي افغانستان كيله جگي اوچون خذمت كورسته ديگن ياش عسكر و منصبدارلرني تيارگرليك دن اوتكزيشده خذمت قيليشي ممكليكي باره سيده اميد بيلديرگن.

افغانستان جمهور رييسي حامدكرزي ملي اردو و منصبدارلري اوچون قوريلگن اكادمي نينگ فايده لنيشگه تاپشيريليشي بو مملكت ني اسره ش اوچون ينه بير مهم آديم ايكني ني ايتيب، افغانستان كوچلري قوشني مملكتلر اردوسيگه برابرليك قيله آليشي ممكنليگي ني تاكيدله دي:"بيزده بيريتانيا نينگ حربي تعليم وتربيه لريني تجربه قيلگن شونده ي قوشنيلر موجود موجود. بيري پاكستان ايكينچي سي هندوستان دير. بيز بو ايكي مملكت حربي كوچلري نينگ ملكه سي، لياقتي و يخشي تيارگرليك كورگنيني بيله ميز. بيز بيريتانيا ياردمي بيلن بو اكادمي ني آچه ميز، بولرنينگ تيارگرليك دن اوتكزيشلري دنياده افغان لرنينگ قهرمانليگي مثال سيز بوله دي".

افغانستان حربي كوچلري اوچون ينگي تاسيش ايتيلگن اكادمي مسووللريگه كوره، بو ينگي اكادمي مركزيده افغان عسكرلري اوچون برچه قوله يليك لر يره تيلگن، بيريتانيا مدافعه وزيري فيليپ هامن بو اكادمي نينگ قوريليشيده باشقه بيرقطار مملكتلر هم ياردم قيلگن دييدي:"افغانستان ملي اردو، بيريتانيا و باشقه مملكتلر جمله دن آستراليا، دنمارك، نيوزليند و ناروي مملكتلري افغانستان ده زمانوي اكادمي اساس قويليشي ده ياردم كورستيشگن. افغانستان ملي اردو كوچلري كيله جك نسلي دير. بيز بوگون بيرينچي كندك منصبدارلريني منصبدارليك اوچون تيارگرليك كوره ياتگني ني كورديك".

بو حربي تعليم مركزي افغانستان پايتختي كابل نينگ شمالغربي ده 20 مينگ جريب ييرده 287 ميليون دالر صرفله نيب، قوريلگن، و هنوز هم ايريم بنالري اوستيده ايش دوام ايتماقده.

بو اكادمي مسووللريگه كوره، بوييرده 6 مينگ دن 7 مينگه قدر حربي محصل تيارگرتيارگرليك كوريب چيقيشي ممكن.

عيني مركزده ، ايرككلر قطاريده منصبدارلر عياللر اوچون هم ياتاقخانه و توله شرايط لي مركز نظرده توتيلگني ايتيله دي.

Бу мавзуда батафсилроқ