تاجيكستانده گي افغان طلبه لري آيلريدن بيري تحصيل خره جتلريني قولگه كيريتمه گنلر

Image caption افغانستان نينگ دوشنبه ده گي ايلچيسي عبدالغفور آرزو، ايلچيخانه افغانستان تعليم وزيرليگي نينگ رخصت سيزليگي بيلن طلبه لرنينگ آيليك تحصيل خره جتلريني توللشگه قادر ايمسليگي ني ايتگن.

تاجيكستان ده گي افغان طلبه لري، افغانستان دولتي تمانيدن يوباريلگن تحصيل خره جتلري قوللريگه ييتمه گني باعث، كته معمالرگه روپه ره ايكنليكلريني ايتيشگن.

اولر آييگه 60 دن 120 دالر افغانستان تعليم وزيرليگيدن قولگه كيريتيشه دي.

بو تعداد دن 25 نفري تاجيكستان ملي عالي اوقوو يورتيده تحصيل قيليشه دي و اولردن 15 ته سي دكترا بوييچه متخصص بوليشماقچي.

تاجيكستان عالي تعليم مركزلريگه كوره، ايران، توركمنستان و اوزبيكستان دن كيين افغانستان طلبه لري كوپراق تاجيكستانده اوقيشه دي.

تاجكستان ملي بيليم يورتي ده تحصيل قيله ياتگن لردن بيري احمد شكيب، توقيز دن آيدن بيري تحصيل خره جتيني قولگه كيريتمه گن.

اونگه كوره، يگانه او ايمس، بلكه قطار افغان طلبه لري شونده ي معما گه دوچ كيلگن.

ايكينچي صنفده درس اوقيه يديگن يعقوب شرافت، تعليم خره جتلري نينگ اوز وقتيده ييتيب كيلمه گني، طلبه لر اوچون معما لي بولگن.

اونينگ ايتيشيچه، بعضي طلبه لرگه آييگه 60 دالر و بعضلريگه ايسه، 120 دالر يعني ايكي خيل خره جت توله نيله دي.

تاجيكستانده گي افغان طلبه لري نينگ بورسيه سي "سي" توري بوليب، خره جتلرنينگ طلبه لراوزلري توله لشي كيره كليگي ايتيلگن.

افغانستان نينگ دوشنبه ده گي ايلچيسي عبدالغفور آرزو، ايلچيخانه افغانستان تعليم وزيرليگي نينگ رخصت سيزليگي بيلن طلبه لرنينگ آيليك تحصيل خره جتلريني توللشگه قادر ايمسليگي ني ايتگن.

اما افغان طلبه لري مملكت رسملري نينگ تاجيكستانگه قيلگن سفرلري چاغيده طلبه لرگه ياردم و معمالري حلي اوچون قطار وعده لر بيريشگن اما حاضرگه قدر وعده لريني حملي قيليشمه گن ديه اعتراض بيلديريشگن.

طلبه شرافت گه كوره، افغانستان عالي اوقوو وزيرليگي طرفيدن طلبه لرگه تحصيل خرجت پوللري توله نيلمه ي ياتگني، بيرقطار طلبه لرنينگ تحصيل ني ترك ايتيشلريگه سبب بولگن. بوندن ايكي ييل مقدم ايكي طلبه تحصيل ني ترك ايتگن.

افغانستان نينگ تاجكستانده گي ايلچيسي، افغانستان عالي اوقوو وزيرليگي رسميلري گه ته يه نيب، افغان طلبه لري نينگ معمالري تيزليك بيلن حل ايتيليشي ني ايتگن.

اونگه كوره، افغانستان عالي اوقوو وزيرليگي جمهور رييسليك اداره سيدن طلبه لرنينگ خره جت پولي تيزده توله نيليشي ني طلب قيلگن. افغانستان ايچيسي، بو ييل تاجيكستان عالي اوقوو وزيرليگي ينگي دن 50 تحصيلي بورس افغان طلبه لرگه بيرگن.