اوبامانينگ ملي خوفسيزليك مصلحتچيسي كابلگه ييتيب كيلدي

رايس خانم نينگ افغانستان خوفسيزليك رسميلري و مدني جماعه چيليك فعاللري بيلن ديدار اوتكزيشي كوتيله دي.

جمهور رييس باراك اوباما نينگ ملي خوفسيزليك مصلحتچيسي افغانستان امريكانينگ خوفسيزليك لايحه سي نينگ اينگ يوقاري درجه سيده ايكني ني تاكيدله گن.

رايس خانم شونينگ ديك، امريكاليك كوچلرنينگ افغانستان ني ترك ايتيش عرفه سيده افغانستان ده گي حربيلري، ديپليماتلري و نادولت نماينده لري نينگ فكريني اورگنماقچي.

رايس خانم، امريكا افغانستان ني خوفسيزليك تامينلنيشي، ترقيات و يخشي حكومتدارليك توغريسيده گي ياردميني دوام ايتديريشي ممكنليگي ني تاكيدله گن.

رايس خانم، افغانستان لويه جرگه سي شو يقينده يكونلنگن بيرچاغده افغانستانگه سفر قيلگن.

بو لويه جرگه اعضالري امريكا وافغانستان ارا امضالنه ديگن كيليشوونامه نينگ مضموني گه ايجابي آواز بيريب، جمهور رييس كرزي دن كيله سي بير آي ايچيده امضالشيني سوره گن.

امريكا هم بو كيليشوونامه جاري ييل آخريگچه امضالنيشي كيره كليگي ني تاكيدله گن.

بو حجت، امريكاليك كوچلرافغانستانده 2014 ييلدن كيينگي حضوري ومآموريتي قنده ي بوليشيني انيقلنتيرگن.

افغانستان جمهور رييسي لويه جرگه ده كيليشوونامه مضموني لويه جرگه و اولوسي جرگه تمانيدن تصديقلنگن تقديرده هم، او بونينگ امضالنيشيني جمهوررييسليك سيلاولردن كيين گه كيچيكتيريشي ني ايتدي.

افغانستان جمهور رييسليك سيلاولري حمل آييده بوليب اوتيشي ممكن.

اما كرزي جنابلري لويه جرگه سونگي ده نماينده لر بو حجت نينگ بير آي ايچيده امضالنيشي ني تاكيدله گنده، آشكارا قرشيليك كورستمه دي.