افغانستانده سیلاو ناظرلر سانی آشیرلیشی کیرک

افغانستان سيلاولر كميسيوني دنيا جماعه چيليگي دن بو مملكتده ناظرلري ساني ني آشيريشيني سوره گن

بو كميسيونگه گوره، حاضر گه قدر سيلاولرني نظارت ايتيش اوچون بير مينگ ايچكي و تشقي نظارتچيلر اوز اسملريني رويخط دن اوتكزگن.

ايتيليشيچه، افغانستان جمهور ريسليك سييلاولريني اوچ مينگ دن زياد ايچكي و خلق ارا ناظرلر نظارت ايته دي.

افغانستان سيلاوللر مستقل كميسيوني خلق ارا نظارتچيلر جمله دن اروپا اتفاقي ناظرلريدن بو مملكت جمهور رييسليك سيلاولريني يقيندن نظارت ايتيشي اوچون اسملريني رويخط دن اوتكزيشگه چقيرگن.

بو كمسيوني ملازملري، حاضرگه قدر يوز ته ايچكي و تشقي اداره لر اوز نظارتچيلريني سيلاولر مستقل كميسيونيگه تنيشتيرگني ايتيشگن.

سيلاولر مستقل كميسيوني سوزچيسي نورمحمد نور، اورواتفاقي نظارتچيلري نينگ هم افغانستان سيلاولريني نظارت ايتيشي ممكنليگي باره سيده وعده بيرگني ني تاكيدله گن.

"حاضرگه قدر يوزدن آرتيق ملي و خلق ارا اداره لرنينگ مينگ دن زياد نظارتچيسي سيلاولر مستقل كميسيونيده رويخط دن اوتيب، نظارت رخصتنامه سيني قولگه كيريتيشگن. بولردن35 فايزي ني عياللر تشكيل ايته دي. بوندن باشقه بيز افغانستان تشقي ايشلروزيرليگي آرقه لي اوروپا اتفاقي ناظرلريني هم نظارت ايتيشگه چقيرگنميز.

شونينگ ديك، سيلاولر مستقل كميسيوني بيلن علاقه ده بولگن باشقه بيرقطار مملكتلردن هم 2014 ييلده بوليب اوته ديگن افغانستان نينگ اينگ مهم سيلاولريني نظارت ايتيشگه دعوت قيلديك".

رسمي حساباتگه كوره، اوتگن ايكي سيلاو يوز مينگ دن آرتيق ايچكي وتشقي ناظرلر تمانيدن نظارت ايتيلگن. سيلاولر مستقل كمسيوني سوزچيسي آلدينده تورگن سيلاولر هم اوچ يوز مينگ ايچكي و تشقي ناظرلر تمانيدن نظارت ايتيليشي ممكنليگي ني ايتگن.

بوندن آلدين بيرلشگن ملتلر تشكيلاتي نينگ افغانستانده گي مخصوص نماينده سي يان كوبيش هم خارجي ناظرلرنينگ افغانستان سيلاولريني نظارت ايتيشي ني ايتيب، سيلاولر شفاف اوتكزيليشي اوچون ايچكي و تشقي نظارتچيلرنينگ اشتراكي مهم ايكني باره سيده تاكيدله گندي.