فرشته بیگم: باقمه کوزیمگه یوره ک نی آغریتر کوز انگلمی

Image caption فرشته بیگیم 14 ياشيده ايلك شعريني آنه تيليده قاغذگه يازيب قالديردي.

فرشته بيگيم مزارشريف ده توغيلگن، اما كيينچه ليك عايله سي بيلن كابلگه باريب يشه گن. او كابلده يوز بيرگن جنگلر طفيلي قيته دن مزارشريف گه كيين ايسه، جوزجانگه باريب كون كيچيريشگه مجبور بولگن.

فرشته بيگيم جوزجانده گي حياتي دوريده آنه تيلي يعني اوزبيكچه ني بيلمه گني وبونگه سوزله آلالمه گني، اوني تاثيرلنتيردي. شو مسله اوني اوزبيك تيليده يازيش و بو تيل ادبياتيني اورگه نيشگه سبب بولگن. او استه ـ سيكين، آنه تيليده يازيش واوقيش ني اورگه نيب، 14 ياشيده ايلك شعريني آنه تيليده قاغذگه يازيب قالديردي. بو شعر اونينگ وجوديده قوانچ و قوت ني اويغاتدي و شعرلريني بيگيم تخلصي بيلن يازه باشله دي.

فرشته بيگيم آنه تيليني يخشي اورگه نيش و مطالعه اوچون اوزبيك تيليده گي كتابلرني قيديره باشله دي، اما اوشه پيتده اوزبيكچه كتابلر ساني آزليگي اونينگ معما گه روپه ره بوليشيگه باعث بولدي.

او حاضر بو تيل ني يخشي اورگنيب آلگن، و اوزبيك تيليني ضیالي لري نينگ اثرلريني دنياگه تنيشتيريشني مقصد قيلگن.

عینی دمده فرشته بیگم غرب ادبیاتینی هم سویدن ده اوقیگن .

فرشته بيگيم ايكه فرزند آنه سي، او اوز حياتي دوريده يخشي يمان كونلرگه دچار بولگن. او عياللرنينگ حياتي ده روي بيره ديگن واقعه لردن قيغوره دي و هر دايم اولرگه عايد مسله لرني شعرلريده عكس ايتديريشگه اورينه دي.

اونينگ شعرلريدن نمونه لر:

باقمه کوزیمگه یوره ک نی آغریتر کوز انگلمی

ایتمه سنگ ده آچیلیب تورگن بوتون سوز انگلمی

بیلمه گی سن، هر یره آغیرلیگی کونگیل ده دیر

آچیلیب تورگن یره بیلگی نی دیر توز انگلمی

یاغدو ایچیده قاره تومن بولمیدی

بوش سوزگه قووانیب سیوه من بولمیدی

آی قولگه کیلرمی قول اوزتگنلرگه

کورمی، بیلمی، مین سیزه من بولمیدی

قیسی تیل گه کویله سم بیلمیدی او

نی دیسم نی ایسته سم قیلمیدی او

سیوگیلیم سیوگی سی تیل نینگ اوچیده

قوش بولیب قوینیمده بیر کیلمیدی او

قیسی گل گه قیسی باغده اوچمه لی؟

قیسی دینگیز قیسی تاغده اوچمه لی؟

قنچه ییللر سوز بیلن سیودینگ منیی

مین بو ییرده سین قیاغده اوچمه لی؟

.................

یرته بیرته توکیلیب آقر ساغینچ اینجو لری

کوزلریم دن، سین اوزاقتن مین تمان باققن سری

تیتره گن ایککی دوداقتن بیرته سوز ایتیش قیین

بیر بوران بار جیملیگیمده سین مینی یاققن سری

قچان کوزلریم نی باغله سم

سینی قرشیم ده کوره من

خوددی اوییم نینگ قرشی سیده تیک توریب

قویاش تولقین لرینینگ یولینی باغلب قویگن تال دیک

.................

کیم سینی نیمه کورسه کورسین

مینینگ کوزیمده اینگ سیویملی سن

چونکه مین

باشقه لرنینگ باقیشیگه ایمس

اوز کوزلریمگه ایشانه من

..............

سیندن قنچه اوزاق قالیشیم نی بیلمیمن

بیراق هر بیر کیچه ده

بیرته یولدوز کوکتن توشیب قالگن

گون کیتکونچه

کیچه لر قرانغو راق بوله دی

...............

سینی ایمس

ساووق لیگینگ نی ایمس

بوتون سیندن کورمه گن

و یوره گیم ده کومگن

تویغولرنی ایمس

بیرگینه قولاغیم نی سیلب

ایچیم نی ایسیتگن

سیسینگ نی ساغیندیم

.................

مین قییرده شعر قیده، شونچه کی کویلر یوره ک

برچه کومگن تویغولرنی بیرمه بیر سویلر یوره ک

مین نی چیکسم بو یشم ده اوشبو تویغو قولیدن

قنچه قاچسم اوزلیگیمدن اوزگه چه اویلر یوره ک