حامدكرزي اداره سي: امريكا افغانستان اردو وپوليسي نينگ يانيلغي تآميناتيني كيسيب قويگن

حامدكرزي نينگ حضوري بيلن اوتكزيلگن افغانستان ملي خوفسيزليك كينگشي ييغينيده، جمهور رييسليك اداره سي ملي اردو وپوليسگه بيريله ياتگن يانيلغي و باشقه تآمينات ماده لر امريكا طرفيدن كيسيب قوييلگني دن خبر بیرگن.

افغانستان جمهور رييسليك اداره سي اوز ويب صحيفه سيده نشر ايتگن خبرنامه ده، مملكت مدافعه و ايچكي ايشلروزيرلري ملي خوفسيزليك كينگشي ييغينيده حامدكرزني ملي اردو و ملي پوليس نينگ بيرنيچه قسم يانيلغي و تآميناتلري امريكا تمانيدن كيسيب قوييلگني باره سيده خبر قيلگني قيد ايتيلگن.

بو خبرنامه ده، افغانستان ملي خوفسيزليك كينگشي امريكا نينگ بوعملي ني آلدينگي وعده لريگه قرشي ايكني ني ايتگن.

افغانستان ملي خوفسيزليك كينگشي، امريكا طرفيدن يانيلغي و تآمينات ماده لري اوزيب قوييلگنيني، افغانستان گه خوفسيزليك پيمان ني امضالش اوچون باسيم اوتكزيش واسطه سي ديه تاكيدله گن.

مصلحتي لويه جرگه اوز پايانيگه ييتگن دن سونگ و جرگه كيله سي هفته ده امريكا بيلن خوفسيزليك پيمان امضالنيشي ني حمايه ايتگندي، اما حامدكرزي بو كيليشوونامه امضالنيشيگه ينگي شرطلرني ايلگري سوريب، پيمان امضالنيشيني جمهور رييسليك سيلاولريدن كيينگه كيچيكتيريشي ني اعلان قيلدي.

او لويه جرگه سونگيده و باراك اوباما ملي خوفسيزليك مصلحتچيسي سوزان رايس بيلن ديدارلشگني دن سونگ، امريكا بيلن خوفسيزليك پيمان امضالشگه افغانستانده صلح تامينلنيشي، طالبان بيلن قيته دن مذاكره لر باشله نيشي، گوانتانامو قماقخانه سيده گي طالب محبوسلرنينگ قوييب يوباريليشي و شفاف سيلاو اوتكزيليشي ني ينگي شرط قيليب كورستگن.

امريكا دولتي بو كيليشوونامه جاري ميلادي ييل نينگ اداغيگچه امضالنيشي ني تاكيدلب، بو پيمان نينگ امضالنيشي امريكاگه 2014 ييلده حربيلري چيقيب كيتگن دن كيين، افغانستان ده اوز حضوريني دوام ايتديريشگه رخصت بيريشي ني ايتگن.

امريكا شونينگديك، كيليشوونامه امضالنيشي خوفسيزليك تآمينلنيشي و افغانلر اورته سيده ايشانچ پيدا بوليشيگه ياردم بيريشي ممكنليگي ني تاكيدله ماقده.

امريكاليك كوچلر حاضرگه قدر افغانستان اردو و پوليسي نينگ يانيلغي ماده لر و باشقه تآميناتلري كيسيب قوييلگني باره سيده هيچ نرسه دييشمه گن.