افغانستان دولتي سيلاولر كيچيكتيريليشي حقيده گي خبرلر ني رد ايتدي

ايمل فيضي، سيلاولر كيچيكتيريليشي حقيده گي گزارشلر بوتكول ناتوغري دييدي.

عاموي اخبارات واسطه لري اوتگن كون سيلاولر مستقل كميسيوني رييسي يوسف نورستاني نينگ سنا مجلسيده"آب و هوا وضعيتي باره سيده بيلديرگن تشويشي ني گزارش ايتگن. يوسف نورستاني" حتي جمهور رييس اهالي دن قولگه كيريتگن شكايت بوييچه بو حقده اوزگريش كيريته آليشيميز ني تكليف ايتدي، چونكه سيلاولرنينگ بوليب اوتيش زماني اساسي قانونده انيقلنگ" دييدي او.

اما جمهوررييس سوزچيسي ايمل فيضي، بي بي سي بيلن اوتكزگن صحبتيده سيلاولر مستقل كميسيوني رييسي يوسف نورستاني نينگ سوزلريگه قول اوريلگن و جمهور رييس سيلاولر كيچيكتيريليشي اوچون هيچ قنده ي تكليف ني ايلگري سورمه گني ني ايتماقده.

"مملكت جمهور رييسي سيلاولر مستقل كميسيوني سيلاولرنينگ بوليب اوتيش تآريخي ني بيلگيلنگن دن بيري، هر دايم برچه دولت اداره لريگه سيلاولر مستقل كميسيوني تمانيدن تعيينلگن تآريخ ني جدي حمايه ايتيشيگه دستور بيره دي"، دييدي ايمل فيضي.

ايتيليشيچه، افغانستان جمهور رييسليك سيلاولري كيله سي ييل حمل آيي نينگ اون آلتينچيسيده اوتكزيله دي و او پيت افغانستان نينگ بير قطار حدودلريده هم هنوزهم قار ياغه دي.

خوفسيزليك پيمان امضالنيشي اوچون ايكي شرط بار

افغانستان جمهور رييسليك اداره سي سوزچيسي، جمهور رييس كرزي خوفسيزليك كيليشوونامه امضالنيشي اوچون ايلگري سورگن ايكي شرط هنوز هم استوار و افغانستان بو خصوصده امريكا نينگ عكس العملي ني كوته دي دييدي.

جمهور رييس قوييگن ايكي شرط، خارجي كوچلر تمانيدن افغانستان اهاليسي اويلريگه قرشي حربي عملياتلرگه چيك قوييش و ايكينچي سي صلح جرياني عملي قيلينيشي دير. بو ايكي حالت ده هنوز هم امريكا حكومتي نينگ قراريني كوتماقده ميز" دييدي جمهور رييس سوزچيسي ايمل فيضي.

حامدكرزي نينگ ايران گه سفر قيليشي

ايمل فيضي نينگ ايتيشيچه، افغانستان جمهور رييسي شو هفته اورته لريده ايرانگه سفر قيليب، ايران جمهور رييس حسن روحاني بيلن اورچره شيشي ممكن.

اونگه كوره، بو سفردن مقصد فقطگينه ايكي تمانلمه مناسبتلر و ايكله مملكت ارا همكارليك ني كينگه يتيريش دن عبارت. "جمهور رييس كرزي نينگ ايران گه قيله ياتگن سفري هيچ قچان بيز و دنيا مملكتلري مناسبتلري گه اينيقسه، امريكا گه تاثير اوتمسليگي ممكن"، دييدي فيضي.

افغانستان وايران اوتگن اون ييل ايچيده يخشي مناسبتگه ايگه بوليشگن، اما كرزي جنابلري آلدينگي هفته گي مصلحتي لويه جرگه ده ايران امريكابيلن خوفسيزليك كيليشوونامه گه اچيق مخالف ايكني ني ايتدي.