ملي خوفسيزليك اداره سي ٢٢نفرني تيرورچيليك هجوملرني اويوشتيريشده عيبلب قولگه آلگن

ملي خوفسيزليك اداره سي سوزچيسي فريدشمال خودكش هجومچيلردن بيري پاكستانليك بولگن دييدي. ملي خوفسيزليك اداره سي مذكور 22 نفرني كابلده تيرورچيليك هجوملرني اويوشتيريشده عيبلب قولگه آلگن. بو اداره سوزچيلريدن بيري فريدشمال نينگ ايتيشيچه، بو شخصلر كابلده اوتكزيلگن لويه جرگه دن بيري، تورلي خيل هجوملرني تشكيلشتيريشده مشغول ايكنلر. شمال جنابلريگه كوره، اوشلنگن لر آلديدن بيش واسكت، خودكش اسبابلر، ماين دن توله بولگن ايكي موتر، سكيز كيلوگرام پارتلاوچي ماده، اونته راكت اوقي و كته مقدارده گي قورال اسلحه قولگه توشيريلگن. ملي خوفسيزليك اداره سي سوزچيسي، قولگه توشيريلگن راكتلر بيلن جمهور رييسليك اداره سي، ملي مدافعه وزيرليگي و كابل هوا ميداني نشانگه آلينگن و كابل شهري نينگ ايريم ساحه لريده خودكش هجوم پلانلشتيريلگن دييدي. فريد شمال گه كوره، حبسگه آلينگنلردن بيري پاكستانليك بوليب، بيرته سي ايسه كاپيسا ولايتي ده گي البيروني بيليم يورتي طلبه سي بولگن. لويه جرگه اوتكزيليشي جرياني خوفسيزليگي قتيق تامينلنگن ايدي، اما اونينگ يقينيده خودكش هجوم عملگه آشيريلدي. قوراللي طالبان بو جرگه گه قرشيليك بيلديريب، امريكا بيلن خوفسيزليك پيمان امضالنيشي ني آگاه لنتيردي.