افغانستان پوليسي بير عيالني تاش كومدي دن قوتقزدي

قندوز پوليسي حليمه نينگ ايري طالبان اعضالريدن بولگني ني ايتدي افغانستان شماليده گي قندوز ولايتي ده پوليس تاش كومدي حكمي اجرا ايتيلمسدن آلدين، قوتقزدي. قندوز رسميلري، طالبانگه قره شلي بيرتعداد شخصلر بوندن اوچ كون آلدين دشت ارچي تومنيده بير عيالني حبسگه آليب، اونگه تاش كومدي حكمي ني صادر ايتگني ني ايتيشماقده. قندوز حاكمي سوزچيسي عنايت الله خليق نينگ بي بي سي گه ايتيشيچه، پوليس تاش كومدي حكمي عملي قيلينمسدن بير نيچه ساعت مقدم تيز عمل قيليب، 35 يشر عيال ني طالبان قوليدن آزاد ايتيشگن. قندوز ولايتي دشت ارچي تومني بو ولايت نينگ بير آز ناتينچ منطقه لريدن سنه له دي. دشت ارچي تومني نينگ قيشلاقلريده طالبان گروهي فعاليت قيله ياتگني ايتيله دي. قندوز خوفسيزليك مسووللري، خانم حليمه گه قرشي تاش كومدي حكمي صادر ايتيلگني ني محل اهاليسي پوليسگه خبر بيرگن دييدي. تاش كومدي دن قوتقزيلگن 35 يشر حليمه اوييگه ييتكزيب قوييلگن. قندوز خوفسيزليك مسووللري بي بي سيگه، حليمه خانم نينگ اويي خوفسيزليگي پوليس طرفيدن تامينلنگني ني ايتيشگن. عين حالده، قندوز پوليس قوماندانليگي سوزچيسي سيدسرور حسيني، مذكور عيال اوچ كون ايچيده طالبان نينگ دشت ارچي تومنيده گي قرارگاه لريدن بيريده حبس قيلينگني دن خبر بيرماقده. اونگه كوره، طالبان بو ولايت نينگ قيشلاقلريده مخفي قرارگاه لر ايجاد ايتگن. بر اساس اطلاعات آقای حسینی، این خانم پنج فرزند دارد و مدتی قبل شوهرش او را به ظن داشتن روابط نامشروع با فرد دیگری، طلاق داده است. حسيني جنابلري نينگ بيرگن معلوماتيگه بنآ، حليمه نينگ ايري طالبان اعضالري دن بيري بوليب، طالبان اولرنينگ اجره لگني باره سيده خبر تاپگن دن كيين، حليمه ني جزالشگه اورينيشگن. افغانستان انسان حقلري كميسيوني اعضاسي ثريا صبحرنگ هم بوحقده معلومات قولگه كيريتگن و اولرنينگ قندوز ده گي نماينده لري مذكور مسله ني تيكشيريشي ممكنليگي ني ايتدي. خانم صبحرنگ، حليمه نينگ پوليس تمانيدن تيزليك بيلن قوتقزيلگني ني آلقيشه دي. او، ايرته گه حليمه ني تينچ مكانگه اوتكزيليشي ممكن دييدي. انسان حقلري بوييچه اداره لرنينگ بيرگن معلوماتلريگه كوره، عياللرگه قرشي زوره وانليك حاللري دولت و نا دولت اداره لرده آشگني ني كورسته دي.