قاري خال محمد محمودي: تنگرا موندن سوا سين ميني سر سان ايلمه

رحمتلي محمدالدين اوغلي خال محمد 1360 ييلده تخار ولايتي اشكمش تومني نينگ چشمه ي ماهيان قيشلاغيده گي دهقانكار بير عايله ده توغيلگن.

او باشلنغيچ مكتب ني اوز محله سيده و ليسه ني ايسه سراي سنگ مكتبيده بيتيرگن. كيين كانكور سيناويده قتنه شيب، تخار تيل وادبيات فاكلته سي نينگ دري بوليميده تحصيل قيلگن.

خال محمد بيليم يورت درسلريني بيتيرگندن كيين، تورلي خارجي و ايچكي اداره لرده وظيفه بجرگن، اما حاضر تخار محلي ملي تلويزيوني ده دركچي صفتيده ايشله ماقده.

او دين، ‌خلق و اوز مدنيتي ني سيوه دي. شو سبب آنه تيلي اوزبيكچه ده شونينگ ديك، فارس دري تيليده هم شعر يازيش يازيشگه ملكه سيگه ايگه. اونينگ ايتگن شعرلري تخار محلي گزيته لريده نشر ايتيلگن. اما اقتصادي قيينيچليكلر سبب شعري توپلمي ني چاپدن چيقه ريشگه قادر بوله آلمه گن.

شاعرخال محمد محمودي، عايله قوريب، بير اوغيل و بير قيزنينگ آته سي.

اونينگ شعرلريدن نمونه:

تنگرا موندن سوا سين ميني سر سان ايلمه

كوزياشمني آقيزيب قلبيم ني بريان ايلمه

وام وقرضگه باتريب هم يوزو باشيم قيب ايتيك

هركس وناكس دميگه جارو نالان ايلمه

خال محمد شعريت دنياسيگه يوز توتگنيگه دنياده گي نابرابرليك و معمالر همده خلقيگه نسبتآ اوز حرمتي ني بيلديريش سبب بولگن دييدي.

او جماعه ده گي كمچيلر و موجودمشكلردن داد اورگنيگه قره مه ي، مشهور وتنيقلي شخصيتلر وصفيگه هم شعرلر يازگن. قوييده گي شعرده حضرت نوايي وصف قيلينگن:

عادل و دانا وزير!

علم وفرهنگ ايگه سي بابا نوايي كبير

نكته دان واينگ خيردلي ، عادل ودانا وزير

فخر ترك و اوزبيك وهم باشقه ايلدير هر ايشيز

بال كلام و هوشمند، اي شوكت وشان لي امير

اول قوروگن باغ ميزگه ، سيزبيريب آب حيات

ايله ديز آيدين وياريق ، نسلينگيز اي دبير

جد لريم هرقيسي سي، كوب كوب بنالر توزه گن

بولمه گن ليك هيچ بناسي، سيز ايشيزديك بينظير

شاعرو شاه خردمند ، يازگوچي لربيزده كوب

شعرلري هرگزايمس دير، سيزشعريزديك دلپذير

هيبتي عالم ني باسگن ، شاه شاعردين بيري

شاه ظهيرالدين"بابر" عالم روشن ضمير

هم جهانگيرشاه ، همايون، بايقراو باشقه لر

برچه سي شاعرولي ، سيزديك ايمس مرد خبير

كاش سيزديك خلقيگه ، خادم بول آلسه محمودي

عالم وعابد بوليب هم شاعرو شخص شهير

بيرليك شعارميز دور !

بو اولكه ياش لري ميز بيرليك شعارميز دور

بيرليك اوچون گراول سك ، بيزافتخارميزدور

تبعيض و قوم پرستليك، هيچ بيرزمان قيلمايميز

كيم مؤمن باله سي ميز، صلح بيزني كارميزدور

بيزدين واولكه ميز بير، تاجيك و ترك ديمي ميز

پشتون بلوچ هزاره ، قوم و تبار ميزدور

موندن بويان بيل آليب ،‌بواولكه ني توزه يميز

بيز يورت وجاي ميز شول، هم شول مزارميزدور

آرياو آريانا ، افغانستان نميز شول

كينديكني قاني تامگن ، گوزل ديارميز دور

تيمور وغزنوي و بابه نوايي ديك بوب

خدمت ايتيش بوايل گه ، بيزنينگ خمارميزدور

برهان وباعث صلح اوقيش و اوقو تو ديب

بو خلق وايل گه ايتماق ، بيزلرني كار ميزدور

فاشست و نشنلست دن ، " محمودي" اوزني اُجرت

حق سويله و حق ايش ايت ، شول بيزني وارميزدور