انسان حقلري مستقل كميسيوني: افغانستانده باله لرگه قرشي جنسي زورلش ميزاني 28 فايزگه آشگن

Image caption افغانستانده باله لرگه قرشي جنسي زورلش ميزاني 28 فايزگه آشگن

انسان حقلري مستقل كميسيوني مملكت 34 ولايتي بويلب تورت مينگ دن آرتيق باله بيلن اوتكزگن صحبتي اساسيده گزارش تيارله گن.

افغانستان انسان حقلري مستقل كميسيوني اوزي نينگ باله لر حقيده گي ييلليك گزارشيده باله لرگه قرشي جنسي زورلش حاللري 28 فايزگه آشگني دن خبر بيرگن.

بو كميسيون رسميلري شنبه كون، بو گزارشدن تشقري باله لرگه اوتكزيله ياتگن جنسي زورلش ميزاني آشگنيگه قضايي اداره لرده گي فساد ني عامللردن بيري صفتيده قيد ايتگن.

انسان حقلري مستقل كميسيوني رييسي سيماسمرنينگ ايتيشيچه، بو اداره لرده باله لرگه قرشي تجاوزعامللري قانون گه مطابق جزالنمه گني، بو مسله نينگ تاباره آشيشي گه سبب بولگن.

اونگه كوره، ايريم حاللرده باله لرگه قرشي جنسي تجاوز عامللري قضايي اداره لرده گي موجود پاره خورليكلر سبب، قوييب يوباريلگن و اولرنينگ دوسيه لري اساسي روشده تيكشيريلمه يدي.

سمر خانم:" جنسي زورلش گه قول اوره ديگن شخصلردن اكثريتي، طالبان نظارتيده گي منطقه لرگه قاچيب كيتيشه دي. اولرگه نسبتآ عدالت تطبيق قيلينمه يدي. فقط طالبان نظارتيده گي منطقه لرگه قاچيب كيتيش مسله سي ايمس، بلكه افغانستان دولت اداره لريده گي پاره خورليك باعث، قولگه آلينگن تجاوز عامللري افسوس كه قوييب يوباريله دي".

باله لرني جنسي تجاوز حاللري ايمس، بلكه انسان حقلري مستقل كميسيوني اوز گزارشيده 300 باله نينگ مخدرماده لرگه بيريلگني و 51 فايزي آغير ايشلربيلن بند ايكني ني قيد ايتگن.

گزارشگه كوره، باله لرعايله اعضالري نينگ بير نيچه نفري مخدرماده لرگه بيريلگني، اولرنينگ معتاد بوليشيگه زمينه يره تگن.

افغانستان نينگ ايريم حدودلريده مخدرماده لر قوله ي شكلده قولگه كيله دي، شو سبب دن افغانستان دنيا ده اينگ كوپ مخدرماده ايشلب چيقه روچي مملكت حسابلنه دي و بو مملكت ده بير ميليون دن زياد معتاد موجود.