شبرغان شهريده موترسايكللرنينگ يوريب ـ توريشي منع ايتيلدي

Image caption سونگی وقت لرده جوزجانده امنیت وضعیتی یمانلشگن.

شمالي جوزجان ولايتي مركزي شبرغان شهريده موترسايكلرنينگ يوريب توريشي منع ايتيلگن. بو تدبير، اوتگن كون شبرغان شهريده گي تفحصات اداره سي قوريچيلريدن بيري ناتنيش قوراللي شخصلر تمانيدن آتيب كيتيلگن دن كيين، جاري قيلينگن. جوزجان امنيه قومانداني فقيرمحمد جوزجاني نينگ بي بي سي گه ايتيشيچه، قوراللي مخالفلر كيينگي پيتلرده باشقه واسطه لرگه كوره، موترسايكلردن هجوم اويوشتيريشده كوپراق فايده لنماقده لر. اونگه كوره، حاضرگي كونده شبرغان شهريده يوريب توره ديگن موترسايكللردن 95 فايزي حجتسيز بوليب، بو مسله خوفسيزليك يامانلنيشي آليب كيليشي ممكن. او، قوراللي شخصلر تفحصات اداره سي قوريچيسي ني اولديريب، قورال اسلحه سيني اوزلري بيلن آليب كيتگن دييدي. اونگه كوره، اولر مذكور شخصلرني حبسگه آليش اوچون جدي قيديرو ايشلريني باشله گن. اما حاضرگه قدر بيرارته قولگه آلينمه گن. بوندن بير نيچه آي آلدين فارياب مركزي ميمنه شهريده هم خوفسيزليك مسله لر باعث، موترسايكللرنينگ يوريب توريشي منع ايتيلگندي. قوراللي مخالفلر دولت خادملريگه قرشي هجوملريني اكثرآ موترسايكل دن فايده لنيب، عملگه آشيره دي. اما جوزجان ده موترسايكللرحجتلنتيريلمه گونچه، شهرده يوريشگه رخصت بيريلمسليگي ايتيله دي. جوزجان امنيه قومانداني، موترسايكللرني ترافيك اداره سيده رسميلشتيريش ايشي باشلنگن، بومسله حل ايتيلگن حالده، جنايي و تيرورچيليك حادثه لر كمه ييشي ممكن دييدي. جوزجان ده بوندن تورت آي آلدين هم قتل، اوغيرچيليك و باشقه جنايي حادثه لر سبب، موترسايكللرنينگ كيچه طرفدن شهرده يوريب توريشي منع ايتيلگندي. اما حاضرگي تدبير قچانگچه جاري قيلينيشي و قنده ي نتيجه بيريشي معلوم ايمس.