افغانستان دولتي تهران نينگ قوراللي مخالفلرني حمايه ايتيشي ني رد ايتدي

Image caption موسي زي نينگ ايتيشيچه، افغانستان اوزي نينگ امريكا و ايران بيلن علاقه سيني معقول درجه ده سقلب قاليشگه قادر بولگن.

افغانستان تشقي ايشلروزيرليگي كابل و تهران ارا همكارليك ميزاني يوقاري درجه ده بوليب، ايران افغانستان دولتيگه قرشي مخالفلرني حمايه ايمسليگي ني ايتگن.

افغانستان تشقي ايشلروزيرليگي سوزچيسي جانان موسي زي فراه ولايتي حاكمي معاوني نينگ ايران افغانستان دولتيگه قرشي قوراللي مخالفلرني حمايه ايته ياتگنليگي حقيده گي اظهاراتي گه نسبتآ، كابل وتهران ارا مناسبتلر يوقاري درجه ده بولگني، ايكله مملكت ارا خوفسيزليك همكارليكلر و يقين دوستليك مستحكم ايكني ني كورستيشيني تاكيدله گن.

اونگه كوره، جمهور رييس كرزي نينگ تهران گه قيلگن سفري ايكله مملكت مناسبتلريني ينه ده كوچه يتيرگن و افغانستان ايران دن همكارليك مناسبتلر كينگه يتيريليشي ني سوره گن.

موسي زي نينگ ايتيشيچه، افغانستان اوزي نينگ امريكا و ايران بيلن علاقه سيني معقول درجه ده سقلب قاليشگه قادر بولگن.

پنجشنبه كوني فراه واليسي معاوني محمد يونس رسولي، ايران افغانستان مخالفلريدن تشكيل تاپگن 540 نفرليك گروه ني تيارگرليك دن اوتكزيب، بوزمه كارليك فعاليتلرني عملگه آشيريش مقصديده افغانستان غربي ولايتلريگه جونتگني ني ايتگندي.

اونگه كوره، ايران ايكريسيده افغانستان دولتي گه قرشي مخالفلرني تيارگرليك دن اوتكزه ديگن مركزلر موجودليگي حقيده ويديو تسمه لر و حجت لر موجود.

ايتيليشيچه، ايران وافغانستان اوزاق مدتلي استراتيژيك پيمان امضاله يدي، افغانستان جمهور رييسي حامدكرزي و ايران رهبري حسن روحاني بو پيمان اوستيده كيليشيب آلگن.

موسي زي، افغان ياشلري نينگ سوريه نينگ قوراللي مخالفلري صفيده جنگ قيله ياتگنليگي حقيده گي خبر رد ايتيب، بو خبر عاموي اخبارات واسطه لري تبليغي ديه تاكيدله گن.

اونگه كوره، افغانستان دولتي تمانيدن آليب باريلگن تحقيقاتده نشر ايتيلگن خبرلر اساسسيز كورستيلگن.