مزارشریفده عیاللرگه قرشی ایکی کونلیک کمپاین سمینار اوتکزیلدی

بو سمنیار بیرلشگن ملتلر تشکیلاتی نینگ رواجلنتیریش لایحه سی یعنی جندر اداره سی نینگ مالیوی یاردمی بیلن افغانستان عیاللر وزیرلیگی طرفیدن یولگه قوییلدی. سمینارده بلخ ولایتی اونلب دولت اداره لری خادملری وعیاللر حقوقی نی حمای ایتووچی فعاللر اشتراک ایتیشدی.

افغانستان عیاللروزیرلیگی مسووللری سیمناردن اساسی مقصد، بلخ ولایتیده عیاللرگه قرشی اوتکزیله یاتگن زوره وانلیلرنی یوق ایتیش یوللرینی کوریب چیقیشدن عبارت ایکنی نی تاکیدلشماقده. بو وزیرلیک نینگ ظرفیت نی یوکسلتیریش و جندر اداره سی مسوولی محمد تمیم:"بلخ ولایتی عیاللریگه قرشی اوتکزیله یاتگن زوره وانلیکلرنی بولایت دولت اداره لری و عیاللرحقوقینی حمایه ایتووچی اداره لرنینگ همکارلیگی بیلن اورته دن یوق ایتیش ومیزانی نی کمه یتیریش یوللرینی بو اوچ کونلیک سیمنارده کوریب چیقه میز. بیز بو سمینارده زوره وانلیک نی یوق اوچون بیر عملی پلان تیارله یمیز و بونی قوشمه روشده عملده تطبیق ایته میز".

تمیم جنابلرگه کوره، سمینار اشتراکچیلریگه زوره وانلیکلر سببلری و اونینگ آلدینی آلیش شیوه لری ایتیب بیریله دی.

اوشونینگ دیک، سمینارده قتنشگن عیاللر، ولایت تومنلریگه باریب، اوییرده گی عیاللرنی زوره وانلیککه قرشی و یوق ایتیش شیوه لری باره سیده معلومات بیریشی ممکنلیگی تاکیدله دی.

عین حالده، بلخ ولایتی عیاللر اداره سی سرپرستی رابعه مرادی، عیاللرگه قرشی زوره وانلیک لرنی یوق ایتیش مقصدیده یولگه قویلیب کیله یاتگن سمینارلر و کمپاینلرنی ثمره لی دیه توصیفلب، بلخ ولایتیده عیاللرگه قرشی زوره وانلیک میزانی اوتگن ییلگه قره گنده بو ییل پسه ییب، عیاللر فعالیتی یخشیلنگن دییدی:" اوتگن ییل بلخ ولایتیده 351 زوره وانلیک حالتی قید ایتیلگندی، اما بختگه موافق بو ییل 201 زوره وانلیک حادثه سی عیاللر اداره سیده رویخطگه آلیگن".

او ، زوره وانلیک میزانی پسه یگنیگه بلخ دولت اداره لری نینگ زوره وانلیککه قرشی جدی اعتبار کورستگنی همده اهالی نینگ اولربیلن همکارلیک کورستگنینی سبب قیلیب کورستدی.

اما عیاللرگه قرشی زوره وانلیکلرنی آلدینی آلیش و اونی اورته دن کوته ریش اوچون کمپاین سمینارلر اوتکزیلر ایکن، بلخ ولایتی ولایت کینگ منشی سی شکیبا شکیب، هلی هم بو ولایت نینگ اطراف منطقه لریده گی عیاللر فعالیت قیلیش حقوقیگه ایریشه آلمه گن دییدی:"ولایت نینگ اوزاق منطقه لریده هنوز هم عیاللر فعالیت قیله آلمه یدیلر، او ییرلرده دولت و مدنی جماعه چیلیک اداره لری اوز لایحه لرینی عملی قیلیشگه موفق بوله آلمه گن. ، اما شهر اطرافده گی منطقه لر عیاللری نینگ فعالیتی یخشیلنگن اولر بیز بیلن سیمنار و کمپاینلرده قتنه شه دی".

بو کمپاین ده عیاللرگه قرشی زوره وانلیکدن کیلیب چیقه دیگن حادثه لر، زوره وانلیک تورلری، سبب وعامللری، یوق ایتیش و کمه یتیریش یوللری محاکمه ایتیله دی.

افغانستان عیاللر وزیرلیگی مسووللری نینگ تاکیدلشیچه، کمپاین کنفرانس شکلده مملکت نینگ اون ولایتیده گی یوقاری مرتبه لی رسمیلری و مدنی فعاللر اشتراکیده یولگه قوییله دی. اما بلخ ولایتی رسمیلری بوگونگی سمینارده فعال قتنشمه گنی سیزیلردی.