افغانستان و ناتو ارا کیلیشوونامه باره سیده مذاکره لرباشلنگن

Image caption فیضی جنابلری، افغانستان ناتو کوچلری نینگ مملکتده قالیشینیگه طرفدار دییدی.

ناتوکوچلری نینگ کیلیشوونامه سی موقعیتی و استقامت جهتی باره سیده باره سیده افغانستان وناتو اورته سیده مذاکره لر باشلنگن.

کیلیشوونامه ده ناتوکوچلری نینگ 2014 ییلدن سونگ حربی حضوری و موقعیتی انیقلنه دی.

شنبه کونی ناتونینگ افغانستانده گی ناحربی نماینده سی موریس یوخمز و افغانستان ملی خوفسیزلیک مصلحتچیسی رنگین دادفراسپنتا اورته سیده کیلیشوونامه باره سیده مذاکره باشلنگن.

جمهوررییس سوزچیسی ایمل فیضی نینگ بی بی سیگه ایتیشیچه، افغانستان دولتی آلدین میلادی 2014 ییلدن کیین ناتو کوچلری نینگ افغانستانده قالیشی گه طرفدار ایکنی نی اعلان قیلگن.

فیضی گه کوره، افغانستان کیله سی کونلرده کیلیشوونامه نینگ مفادی باره سیده ملی خوفسیزلیک ییغینیده بحث باشله یدی.

ایتیلیشیچه، ناتو کوچلری نینگ موقعیت کیلیشوونامه سی افغانستان و امریکا آره سیده گی ایکی تمانلمه خوفسیزلیک کیلیشوونامه دیک. اما ناتو کوچلری نینگ 2014 ییلدن کیینگی رولی فرقلی راق.

بو کیلیشوونامه گه بنآ، ناتو افغان کوچلرینی تعلیم، مصلحت و همکارلیک کورسته دی اما اوروش ده قتنشمه یدی.

ناتو باش کاتبی اندرس فوگ راسموسن، افغانستان وناتو اورته سیده باشلنگن مذاکره لرنی آلقیشله گن.

افغانستان جمهور رییسلیک سوزچیسی گه کوره، بو کیلیشونامه باره سیده گی باشلنغیچ مذاکره لر بوندن آلدینلر باشلنگن ایدی. بوگون ایلک لایحه رسمی روشده افغانستان دولتی گه تقدیم ایتیلگن.

بوندن آلدین ناتو کیلیشوو نامه باره سیده مذاکره لر باشله گن، اما افغانستان وامریکا اورته سیده گی خوفسیزلیک کیلیشوونامه امضالنیشی نی کوتیب قالگن.

اوتگن آی جمهور رییس کرزی امریکا بیلن امضالنه دیگن خوفسیزلیک کیلیشونامه باره سیده مصلحتی جرگه اوتکزگن ایدی، جرگه کیلیشوونامه نی تصدیقله دی و کرزی جنابلریدن بونی امضالشینی طلب قیلدی.

اما جمهور رییس کرزی بو ایکی تمانلمه کیلیشوونامه نی طالبان بیلن صلح مذاکره لری کفالتلنمه گونچه امضاله مسلیگی نی تاکیدله دی.