اينگ مشهور اوق آتر قورال اختراعچيسي ـ كلاشنیكوف عالم دن اوتدي

كلاشنیكوف اوق آتر قورال نينگ اختراعچيسي ميخايل تيمافيويچ كلاشنیكوف 94 ياشيده عالم دن اوتگن. 17 نوامبر كوني او آشقازان قانه شي بيلن شفاخانه گه ياتقيزيلگندي.

كلاشنیكوف قورالي 1947 ييل يره تيلگن و 20 عصرنينگ اينگ مشهور اختراعلري سيره سيگه كيريتيلگن.

قورال دنيا بويلب اينگ كوپ قوله نيله ديگن قورالگه ايلنگن، حاضر 100 دن آرتيق دولت قوراللي كوچلري فايده لنه دي.

عين پيتده اي كا47 جهانده گي انقلابلر رمزيگه هم ايلنگن، قطار ملي بيراقلرده هم عكس ايتگن.

جمله دن، ويتنام، جزاير و افغانستان ده گي جنگ ميدانلريده قوله نيله دي.

فلسطينده گي گروه لر هم كلاشنیكوف قورالي دن كينگ فايده لنيشه دي و اسامه بن لادين نينگ هم قوليده پيدا بولگندي.

قورال نسبتآ ساده ايشلنگني باعث ارزانگه توشه دي همده جنگ ميدانلريده قوللش ايشانچلي و آسان قول نيله دي.

ميخايل كلاشنیكوف 1919 ييل 10 ديسيمبرده آلتاي اولكه سيده گي كوريه قيشلاغيده دنيا گه كيلدي. او عايله ده گي 18 فرزند دن بيري بولگن.باله لر نينگ فقط آلتي نفري يشب قالگن.

كلاشنیكوف 1938 ييل قيزيل اردو صفيگه چيقه ريلگن و اونينگ يره تووچنليك قابليتي دن قورال ـ يراغلر و روس تانكلريده ايشله تيلگن اوسكونه لر ثمره دارليگي ني آشريش يوليده فايده لنيلگن.

1941 ييل اكتوبريده او باشقرگن تانك آلمانلر سناريوديگه دوچ كيلگن و تن جراحتي آلگن. شوندن كيين، او اوز ناميني مشهور قيلگن اوق آتر قورال اختراعسي بيلن شغللنگن.

حربي شفاخانه ده بولگ پيتي صفداش عسكرلردن بيري نيمه اوچون روسيه اردوسي آلمان قوشينلرينيكيگه اوخشش قورال گه ايگه ايمسليگي حقيده سوره گن.

"خلاصه، مين عسکر اوچون اوتومات قورال اختراع قيلديم. او كلاشنیكوف قورالي ديب ايتيلدي:، ديگندي ميخايل كلاشنیكوف اوزي.

ينگي قورال 1949 ييلدن باشلب سابق شوروي قوراللي كوچلري طرفيدن فايده لنيله باشلنگن و او استالين مكافاتي بيلن تقديرلنگن.

1987 ييل ميخايل كلاشينكوفگه جمهور رييسليك " فخري فقراسي" ديگن نام بيريلگن. 75 ياشگه كيرگني مناسبتي بيلن ايسه، جمهور رييس ليلين اوني جنرال ـ مه يار عنواني بيلن تقديرله گن.

اوزي ايشله گن قورال نينگ ساده ليگي باعث او اختراع سيدن قدر كته بايليك آرتيره آلمه گن.

اما، اي كا47 اونينگ نامي تآريخيده اوچمس ايز قاليشيني كفالتله يدي.

ميخايل كلاشنیكوف اوق آتر قورالي كوپلب انسانلر عمريگه ضامن بولگني يوزه سيدن هيچ قنده ي مسووليتني قبول قيلمه گن.

"مينينگ مقصديم اوز وطنيم چيگره لريني محافظه قيليش اوچون قورال يره تيش ايدي. كلاشينكوف كوپگينه اختلافلي جايلرده قوله نيلگني مينينگ عيبيم ايمس. بونگه اختراعچيلر ايمس، اوشه مملكتلرنينگ سياستچیلری عيبدار"، ديب ايتگن ميخايل كلاشنیكوف.