افغانستان اهاليسي نينگ كيله جك سيلاولرده اشتراك ايتيش قيزيقيشي آشگن

بو قيزيقيش "خلق ارا دموكراسي" تشكيلاتي تمانيدن افغانستان نينگ 34 ولايتيده 2500 نفر اوستيدن اوتكزيلگن صحبتده كورستيلگن. بو سوراو گه كوره، اهالي نينگ 1393 ييل سيلاولريده اشتراك ايتيش قيزيقيشي آشگن.

"خلق ارا دموكراسي" ناميده گي موسسه نينگ ايتيشيچه، صحبت اوتكزيلگنلردن 85 فايزي كيله سي سيلاولرده اشتراك ايتيشلري ني ايتيشگن.

بو موسسه مسووللريدن ياسين حسيني نينگ ايتيشيچه، بو سورا وده 77 فايز اهاليسي سيلاولرده قتنه شيشي گه قره مه ي، خوفسيزليك ني اينگ كته تهديد ديه تشويش بيلديرگن. اما 46 فايزي سيلاولر جرياني ده خوفسيزليك وضعيت ني تخمين قيليش امكان سيز دييشگن.

حسيني:" اهاليدن سيلاولر شفاف بوليب اوتيشي ممكن مي ديب سوره گنيمده؟ 9 فايز اصلا شفاف بولمسليگي ممكن، 48 فايزي بير آز شفاف و 14 فايزي سيلاولر عمومآ شفاف بوليب اوتيشي ممكن و 28 فايزي شفاف دييه آلمسليگينی ايتدي."دييدي.

بو سورا وده قتنشگنلردن 33 فايزي افغانستان يخشي يولگه قره ب كيته ياتگني ني ايتيشگن و بونگه قيته قوريش همده قيزلر اوچون تعليم زمينه لري يره تيلگني ني دليل قيليب كورستيشگن.

اما 21 فايز اهالي خوفسيزليك تامين بولمه گني، حكومت ضعيفليگي، افغانستان ناتوغري تمان يولگه آله ياتگني ني ايتيشگن.

بو سورا وده اهالي نينگ جمهور رييسليك نامزدلريني تنيب تنيمسليگي و نامزدلردن قيسي بيري غلبه قازانيشي باره سيده سوريلگن.

شو سببدن بيرقطار مدني فعاللر و سياسي شخصيتلر بو سوراو نتيجه لري باره سيده تنقيد قيليب، اوني بيرقطار نامزدلر فايده سي اوچون بير تبليغات ديه تاكيدلشگن.

اما افغانستان موسسه سي رييسي محمدسلطاني، افغانستان ده گي معمالرگه بنآ، يخشي وتوغري شكلده سوراو اوتكزيش قيين دييدي.

اما بو سوراو ني يولگه قويگن موسسه مسووللريدن رامين جاويد، قيلينگن تنقيدلر ني ناتوغري بهالب، بو سوراو علمي معيارلر اساسيده عملگه آشيريلگني ني ايتگن.

خلق ارا دموكراسي موسسه سي ايركين، شفاف سيلاولر اوتكزيليشي همده دولت لر گه رواجلنيش لايحه لري اوچون مصلحت بيره دي.