"افغانستانده اوتگن اوچ ييل ايچيده قولگه كيلگن يوتوقلر 2017 ييلگچه برباد كيتيشي ممكن"

امريكاده نشر ايتيله ياتگن واشينگتن پست گزيته سي نينگ يازيشيچه، ینگی اوتکزیلگن استخباراتی تیکشروگه سونگی

اوچ ييل ايچيده افغانستانده قولگه كيلگن يوتوقلر، 2017 ييلگه قدر اورته دن كيتيشي ممكن لیگی معلوم قیلینگن.

امريكا اون آلتي اطلاعاتی اداره لري اشتراكيده اوتگزيلگن ملي استخبارات نينگ تيكشيروويده، افغانستانده طالبان و باشقه زوره وان شخصلر قيته دن كوچه ييب، افغانستان نينگ ايريم منطقه لري دولت نظارتيدن چيقيشي ممكنليگي ايتيلگن.

بو گزيته نينگ گزارشيگه كوره، بو تيكشيرووده بير نيچه مينگ امريكاليك عسكرلرنينگ افغانستانده قاليشي و امريكا نينگ اقتصادي ياردملري دوامي هم بو وضعيتگه ياردمچي بوله آلمه يدي.

واشينگتن پست روزنامه سي، گزارش ني تيارله گن شخصلر، طالبان و اوروش جنايتچيلري قوليگه توشه ديگن منطقه لر نقشه سي باره سيده انيق معلومات بيرمه گن، اما واشينگتن پست افغانستان مركزي دولتي زمان اوتيشي بيلن مملكت نينگ بعضي بير منطقه لريني نفوذلي و طالان گروهي گه بيريش بيلن، ضعيفلشيشي ممكنليگي ني تاكيدله گن.

اما افغانستان دولتي بو گزارش گه اونچه هم اهميت بيرمه ي، بونده ي گزارشلر عمومآ آلگنده ناتوغري ديه تاكيدله گن.

افغانستان تشقي ايشلر وزيرليگي سوزچيسي جانان موسي زي:"بير حالت دن باشقه سيده، بونده گزارشلر ياهم تيكشيروولر بوتونله ي ناتوغري اثباطلنگن".

بو تيكشيرووده، امريكا وافغانستان اورته سيده گي ايكي تمانلمه خوفسيزليك كيليشوونامه امضالنمه گن حالده، افغانستان خارجي كوچلرنينگ چيقيب كيتگني دن كيين، اقتصادي ميلياردلب دالر ياردملري تيز وقتده تالان تاراج قيلينيشيني احتمالي موجودليگي قيد ايتيلگن.

بو تيكشرووني اوقيگن رسميلردن بيري نينگ واشينگتن پستگه ايتيشيچه، ماليوي همكارليك و خارجي كوچلرنينگ حضوري سيز حالتده، وضعيت تيزليك بيلن يامانلنيشي ممكن.

واشينگتن پست گه كوره، باشقه بيرقطار آدملر بو تيكشروونينگ سلبي نقطه لريني تنقيد قيليب، تيكشرووده افغانستان خوفسيزليك كوچلري كوچ قوتي تصويرلنمه گنيني ادعا قيليشگن.

عين حالده، امريكا بير يوقاري مرتبه لي رسمي سي، امريكا استخبارات اداره لري هر دايم افغانستان خوفسيزليك كوچلري ني كم بهاله گنيني تاكيدله گن.

امريكا رسيملريدن بيري بو گزارش ني اوتگن تيكشروولردن كوره، قرانغوراق ديه تعريفله گن. او شونينگ ديك، وضعيت انيق معلوم بولمه گني باعث، افغانستان ده جنگ كيله جگي باره سيده بشارت بيريش امكان سيز ديگن. او سيلاولر نتيجه سيني افغانستان كيله جگي گه تاثير اوتكزه ديگن مسله لردن ايكني ني ايتگن.

بوندن اوچ ييل مقدم، امريكا جمهور رييسي باراك اوباما افغانستانده عصيانچيلرني ضعيفلشتيريش اوچون، امريكاليك كوچلرنينگ ساني ني آشيريب، افغانستان خوفسيزليك كوچلري ني كوچه يب تيريشي ني تاكيدله گندي. بو تدبير هيچ بولمسه هم مقصدگه موافق بولدي.