افغانستان جمهور رييسليك بيرقطار نامزدلري اوروش جنايتچيليگيده عيبلنگن

افغانستان سيلاولرمستقل كميسيوني نينگ شكايتلر بوييچه كميسيوني گه كوره، جمهور رييسليك نامزدلري و معاونلري گه قرشي ييتي جدي شكايت حاللري كميسيون گه ييتيب كيلگن.

بو كميسيون سوزچيسي نادرمحسني نينگ بي بي سي گه ايتيشيچه، مذكور ييتي حالتي نينگ جدي ليگيگه قره مه ي، بيرقطار نامزدلر اوروش جنايتچيليگيده عيبلنگن، كميسيون بو شكايت لرني تيكشيريشگه قادر ايمس. شو سبب دن بو ييتي حالت عدلي وقضايي اداره لرگه يوباريليشي ممكن.

محسني گه كوره، مذكور شكايتلر صلاحيتلي محكمه تمانيدن تصديقلنگن حالده، عيبلنگن شخص كيله سي ييل جمهور رييسليك سيلاولريده قتنه شگن نامزدلر رويخطي دن آليب چيقه ريليشي ممكن.

محسني جنابلري، شرايط گه ماس بولگن نامزد سيلاولرگه حتي بير كون قالگن ده هم انيقلنسه، رويخط دن آليب تشلنه دي دييدي.

افغانستان سيلاولر مستقل كميسيوني شكايتلر بوييچه كميسيوني سوزچيسي، كميسيونگه ثبت ايتيلگن ييتي حالت شكايت ني اوروش جنايتچيليگي تشكيل بيره دي دييدي.

جمهور رييسليك نامزدلري نينگ نهايي رويخطي بوندن كميده بير آي آلدين افغانستان مستقل كميسيوني تمانيدن اعلان ايتيلدي اولر 11 نامزد و 22 معاون دن عبارت.

بو رويخط دن كيين افغانستان سيلاولر شكايتلريني تينگلش كميسيوني نامزدلرنينگ حقوقي صلاحيتي تيكشيريليشي ني باشله دي و حاضر بو كميسيون تيكشيروو ايشي يكونلنگني ني اعلان قيلگن.

افغانستان جمهور رييسليك سيلاولري 1393 ييل حمل آيي 16 ده بوليب اوتيشي كوتيله دي.