هراتده كوزدن عاجز بولگن تورت شخص عالي تحصیلگه ايگه بوليشدي

بو ناگرانلر اوتگن هفته هرات عالي تعليم درگاهيني بيتيريشدي. بيتيريش مراسمي هراتده گي محتشم هوتللردن بيريده اوتكزيلگن.اولر تورت ييل عالي تحصيلني قطار معمالر بيلن بيتيريشگه قادر بوليشگن.

بو ناگرانلرني بو يول ده مدني جماعه چيليك فعاللري ترغيب و تشويق ايتيشگن.

كوزي عاجز بو ييگيتلر، اوقيش دوريني بيتيرگنليكلريدن جوده هم خرسند. اولر تورت ييل سبق ني فقط گينه تينگلش بيلن اورگه نيب آليشگن. آوازلرني يازيب آليشگن، كيين به تفصيل تينگلب، يادلشگه حركت قيليشگن.

مذكور شخصلر شونينگ ديك، ناگران لراوچون امكانيت لر آزليگي دن شكايت ايتيشيب، بو يولده قطار معمالرگه دوچ كيلگنليكلريني ايتيشگن.

هرات ده حاضرگي كونده كميده بير مينگ دن آرتيق ناگران موجودليگي ايتيله دي. بو ولايتده ناگرانلر اوچون قطار مكتبلر ايجاد ايتيلگن، بو مكتبلردن بيريده كميده 70 نفر ناگران سبق اوقيشه دي.

ناگران يوقاري فاكلته لرايمس، بلكه اوقيتووچي تربيه لش موسسه لريگه قبول قيلينه دي. اما بو ناگران لر يوقاري تعليم درگاه لريده قبول بوليشلريني طلب قيليشماقده.

هرات ولايتيده حاضرگي كونده، كوزدن عاجز بولگن شخصلرني حقوقي تامينلنيشي اوچون حمايه ايتووچي دولت ونا دولت تشكيلاتلر فعاليت قيله ياتگني گه قره مه ي، بوندن ايكي ييل مقدم معارف وزيرليگي تمانيدن ناگران لر اوچون روشندلان ناملي بير مكتب ايجاد ايتيلگن.

مذكور مكتب ده بيرينيچي صنف دن 7 صنفگچه كميده 70 قيز بو باله تعليم آلماقده لر. اما مكتب اداره سي مسووللري، ناگرانلر اوچون ييترلي اوقوو قوراللر موجود بولمه گني ني ايتگن.

هرچند افغانستان ده کوزدن عاجز بولگن لرساني باره سيده انیق رقم موجود ایمس، اما هرات ولایتی ناگرانلر مكتب اداره مسووللري، نیچه ییل الدین بیرلشگن ملتلرتشکیلاتیگه تگیشلی بیر موسسه تمایندن اوتكزيلگن بير تیکشيرو نتیجه سيگه بنا، هرات ده 1200 کیشی و بوتون ممکلت ده مطلقا کوره آلمه ديگن قریب 400 مینگ کیشی حیات کیچیره یاتگني تخمین قيلينگن.