خودكش هجوم اويوشتيرووچي بير اون يشر قيز، هجوم دن آلدين قولگه آليندي

افغانستان چيگره پوليسي خوفسيزليك كوچلري كروانيگه هجوم قيليش نيتيده بولگن اون يشر قيزني قولگه آلگن. افغانستان ايچكي يشلروزيرليگي مذكور قيز، اوتگن كون كيچقرون هلمند ولايتي خانشين تومنيده قولگه آلينگني ني ايتگن.

بو وزيرليك بير خبرنامه سيگه كوره، اوشلنگن قيز اكه سي تمانيدن خودكش هجوم اويوشتيريشگه ترغيبلنگن.

ايتيليشيچه، مذكور قيزنينگ اكه سي طالبان نينگ كته قوماندانلريدن بولگن.

اما طالبان گروهي هنوزگچه بو حقده فكر بيلديرگنيچه يوق.

بوندن آلدين هم طالبان باله لرني سوء استعمال قيليب، خودكش هجوم اويوشتيريشگه ترغيبله گني ايتيلگندي. اما ايلكبار دير كه بير اون يشر قيز اوزيني پارتله تيشي حقيده خبر قيلينماقده.

باله لر حقوقي ني حمايه ايتووچي خلق ارا تشكيلاتلر باله لردن خودكش هجوملرده فايده لنيش ميزاني آشگني دن خواطر بيلديرگندي.

بوندن ايكي ييل آلدين انسان حقلري تشكيلاتي طالبان دن اوز فعاليتلريده باله لرني سوء استعمال قيلمسليگي ني سوره گندي.