افغانستان فوتبالي فيفانينگ قهرمانليك اويين مكافاتيگه سزاوار تنيلدي

افغانستان فوتبال فدراسيوني فيفانينگ میلادی 2013 ييل ده گي اويين مكافاتيني كسب ايتدي.فيفا هر ييلي فوتيال اويين قاعده قانونلريني رعايه قيلگن تيمگه بو مكافاتني ساوغه قيله دي.

خلق ارا فيفا يا فوتبال فدراسيوني، افغانستان ني بو مكافاتگه سزاوار تنيلگني سببيني بونده ي ايضاحله گن:"افغانستان فوتبالي اوتگن بير ييلده مملكت بويلب يخشي رواجلنگن و بير دهه اوروش نينگ يامان عاقبتلريگه قره مه ي، بو سپورت نينگ رواجلنيشي اوچون ثمره لي و مهم آديملر ايلگري سوريلگن".

مذكور مراسمده مكافات، افغانستان فوتبال فدراسيوني رييسي كرام الدين كريم گه بيريلدي.

كريم جنابلري مكافات ني قولگه كيريتگني دن سونگ، اوتگن بير ييل ايچيده اونينگ همكارلري جوانمردانه اويين ني روحلنتيريش اوچون دايما سعي و حركت قيلگن و قولگه كيريتگن يوتوقلر افغانستان بويلب همه گه معلوم ايكنيني تاكيدله دي.

فيفا گل لايحه سي همكارليگي بيلن، افغانستان ساخته گي چمن ميدانلريگه ايگه بولدي.

2013 ييلده اورتاغليك اويينلرده روي بيرگن مهم واقعه لردن بيري، جنوبي قوشني پاكستان و افغانستان تيملري نينگ اون ييلدن سونگ مسابقه سي ايدي. افغانستان ملي تيمي بو مسابقه ده پاكستان ني اوچ ـ صفر نتيجه سي بيلن مغلوب ايتدي. بو اويين نينگ كيينگي دوري پاكستان نينگ لاهور شهريده بوليب اوتيشي كوتيله دي.

افغانستان فوتبالي نينگ 90 ييلليك تآريخي ده ايلك بار دير كه مملكت فوتبالي فيفا نينگ مكافاتيگه سزاوار تنيله دي.

2012 ييلده اوزبيكستان فيفا نينگ جوانمردانه فوتبال مكافاتيگه ايريشگندي.

افغانستان فوتبالي اوتگن ييلي اوزي نينگ جنوبي آسيا مسابقه لريده كته يوتوقلرگه ايريشدي. بو تيم دنيا بويلب جدولي ده 129 اورين ني ايگللشگه قادر بولدي.

فيفا افغانستان فوتبالي نينگ يوتوقلريني تاريخ ده مثلي كوريلمه گنيني ايتگن.