اوباما، گيتس كتابيده گي خاطره لرگه عكس العمل بيلديردي

Image copyright AP

امريكا جمهور رييسي رابرت گيتس خاطره لري ناميده گي كتابگه ايلك عكس العمليده اونينگ افغانستان باره سيده گي سياستي و اوزي تنقيد قيلينگنليگي ايتيب، بو مملكت باره سيده گي استراتيژيسي ني حمايه ايتگن.

جمهوريتچيلردن بولگن رابرت گيتس اوباما دولتي ده ايكي ييل مدافعه وزير صفتيده وظيفه بجردي.

سابق مدافعه وزيرنينگ اظهاراتي باره سيده بيريلگن سوالگه، رابرت گيتس گه حرمت قايل من، اما اوندن دايما امريكا نينگ افغانستان ده گي ماموريتيگه ايشانچي كامل بوليشي ني سوره ي من ديب جواب قيترگن.

امريكا سابق مدافعه وزيري رابرت گيتس، اوزي نينگ خاطره لري ناميده گي كتابيده اوباما نينگ افغانستان باره سيده گي سياستي ني تنقيد ايتگن.

گيتس جنابلري جورج بوش دوريده هم و اوباما دوريده هم مدافعه وزير صفتيده خذمت قيلگن. اونينگ كتابيده باراك اوباما اوزي نينگ افغانستان گه عايد استراتيژيسي باره سيده ايشانچي نی قولدن بيرگني ني قيد ايتگن.

بو كتابگه كوره، اوباما امريكا نينگ افغانستانده گي كوچلري باش قومانداني جنرال ديويد پتريوس گه نسبتآ ايشانمسليگي همده حامدكرزيگه هم قيزيقمسليگي تاكيدلنگن.

رابرت گيتس 2006 ييل نين اداغيده جورج بوش تمانيدن مدافعه وزير صفتيده تعينلندي و اوباما حكومتي باشلنگني دن 2011 ييلگچه لوازميده قالدي.

كرزي چيتله تيش اوچون سعي وحركت

امريكا سابق مدافعه وزيري رابرت گيتس، اوز كتابيده امريكا 2009 ييلده بوليب اوتگن سيلاولرده حامدكرزي ني حاكميتدن چيتله تيشگه حركت قيلگني ني فاش ايتگن. گيتس بو حركت ني "خام فتنه" ديه توصيفله گن.

اما اوباما بو حقده عكس العمل بيلديرمه گن.

جمهور رييس كرزي هر دايم امريكا اوني حاكميت دن چيتله تيشگه حركت قيلگني ني ادعا قيلگن. اما واشنگتن 2009 ييلده گي سيلاولرده اره لشمه گنيني تاكيدلب، فقط دموكراسي ني حمايه ايتگنيني معلوم قيلگن.

آلدينراق آق اوي سوزچيسي كاتلين هايدن، گيتس جنابلري نينگ ادعاسيني قتيق رد ايتيب، امريكا افغانستانده تينچليك و دموكراتيك سيلاو بوليب اوتيشيگه ايشانه ديدي.

2009 ييلده گي سيلاولرده كته قلابليك يوز بيرگني ادعا قيليندي. نهايت بو سيلاو حامدكرزي و عبدالله عبدالله ارا ايكينچي دورگه قالديريلدي، اما عبدالله دولت نينگ قيلميشيگه اعتراض بيلديريب، ايكينچي دورده قتنشمه دي. كرزي ايسه، سيلاوده غالب اعلان قيليندي.

جمهور رييس كرزي بو ييل خارجي لرنينگ جمهور رييسليك سيلاولريده اره لشيشيني، امريكا بيلن خوفسيزليك پيمان امضالنيشي كيچيكتيريلگنليگي دليللردن بيري صفتيده تاكيدله ماقده.