حامدكرزي امريكابيلن خوفسيزليك پيمانني امضاله مسليگي سببلريني ايتيب بيردي

Image copyright AP

افغانستان جمهور رييسي حامدكرزي اوزي نينگ بي بي سي بيلن بولگن صحبتيده امريكا بيلن پيمان امضاله مسليگي سببلريني ايتيب، اوز ايشانچي گه نقصان ييتكزيلمسليگي حقيده گي ادعاني رد ايتگن.

كرزي جنابلري گه كوره، اوز مملكتيگه تينچليك تامينلنمه گونچه و امريكا افغانستانده طالباگه قرشي عملياتلريني دوام ايتديره ويرگن حالده، امريكا بيلن خوفسيزليك پيمان امضاله مه يدي.

او شونينگديك، امريكا نينگ افغانستانده گي قيلميشلريني تنقيد ايتيب، امريكا، بريتانيا و طالبان اونينگ حكومتي ني قوله تيشده فتنه اوينشگنيني ادعا قيلگن.

كرزي جنابلري بي بي سي مخبري يلدا حكيم بيلن اوتكزگن صحبتيده، پيمان امضالنيشيده قالديرگن ميراثلري برباد ايتيليشيدن تشويشده ايكني ني تاكيدله گن.

اما افغانستان جمهور رييسي بوندن آلدين هم مخبرلرگه بو حقده اوز فكرو ملاحظه لريني آچيقلب بيرگندي.

بوندن آلدينگي كونلرده امريكا طالبان بيلن صلح مذاكره لر اوچون زمينه يره تمه گونچه، خوفسيزليك پيمان گه هيچ قچان قول قويمسليگي ني ايتگندي.

او امريكاني صلح تامينلنيشي باره سيده گي صداقتيني سوال آستيگه قوييب:"افغانستان ده فقط گينه امريكا و پاكستان آرقه لي صلح تامينلنه آله دي. پاكستان نينگ حصه سي ني اونوتيشمسليك كيره ك. طالبان پاكستان دن توريب فعاليت قيليشسه، پاكستان بونگه شيريك. اگر طالبان افغانستان دن توريب ايشله سه لر، بو بيزگه تيگيشلي. شو لحاظ دن امريكا حربي عمليات اوتكزيشگه حقلي ايمس، بو مسله بيز وطالبان گه قره شلي" دييدي حامدكرزي.

افغانستان جمهور رييسي نينگ ايتيشيچه، امريكا افغانستانگه تيروزيم گه قرشي كوره شيش اوچون كيلگن، تيروريستلر پاكستانده مركزلشگن.

حامدكرزيگه كوره، او اصولآ امريكا بيلن خوفسيزليك پيمان امضالشگه مخالف ايمس، اما امريكا اونگه باسيم اوتكزيب، پيمان ني امضالشگه مجبور له ماقده، اما او باسيم بيلن پيمان ني امضاله مه يدي.

كرزي جنابلري اوزيگه اوتكزيله ياتگن باسيم ني 1893 ييل ديورند شرطنامه سي امضاسي چاغيده عبدالرحمن خانگه اوتكزيلگن باسيم گه تقاسلب، بيريتانياليكلر افغانستان پادشاهلريني شرطنامه امضالشده مجبور له گنديك، امريكا هم عينآ شونده ي باسيم اوتكزه ياتگني ني ايتگن.

حامدكرزي نينگ تاكيدلشيچه، اوتميشدن اورگنگن تجربه لرگه اساسا، افغانستانني باسيم آستيگه قوييب، هيچ قچان پيمانگه قول قويمسليگي ممكن. او باسيم و تهديدلردن قورقمه ي، اهاليگه قرشي روحي جنگ لر بيزني پيمان امپضاله مسليگيميزگه سبب بوليشي ممكن ديگن.