افغانستان دولتي خارجيلرنينگ حبسگه آليش صلاحيتي ني منع ايتدي

Image copyright arg

ييغين اشتراكچيلري، خارجي كوچلرنينگ افغانستانده عمليات اوتكزيش و افغانلرني حبسگه آليشگه حقلي ايمسليگي تاكيدلنگن. اوتگن كون جمهور رييسي حامدكرزي باشچيليگيده اوتكزيلگن ييغينده خارجي كوچلر افغانستانده افغانلرني قماققه آليش حقيگه ايگه ايمسليگي قيد ايتيلگن.

مذكور ييغينده مملكت حربي يوقاري مرتبه لي ملازملري حامدكرزي بيلن بگرام قماقخانه سي ده گي محبوسلرنينگ دوسيه لري تيكشيريليشي باره سيده صحبت قيليشگن.

بگرام قماقخانه سي ده گي محبوسلرنينگ دوسيه لري تيكشيريليشي بوييچه تشكيل ايتيلگن كميته، طالبان گه اعضا و اوته خطرلي 88 محبوس دن 37 ته سيني گناهكارليگيگه قره مه ي، آزاد ايتيشيني معلوم قيلگن.

اوتگن ييل مارچ آييده بگرام قماقخانه سي مسووليتي افغانستان حكومتيگه تاپشيريليشي باره سيده ناتو كوچلري بيلن كيليشوو عملگه آشيريليب، خارجي كوچلر نينگ افغانستان ده حبسگه آليش حقوقي منع ايتيلدي.

خبرنامه گه كوره، مذكور ييغينده، افغانستان عالي محكمه رييسي، عدليه وزيري، ايچكي ايشلر وزيري، باش قاره لاوچي، ملي خوفسيزليك مصلحتچيسي و بيرقطار حربي يوقاري مرتبه لي ملازملر قتنشگن.

افغانستان جمهور رييسي حامدكرزي بگرام قماقخانه سي ده گي محبوس لرنينگ دوسيه لري تيكشيريليشي اوچون تعيين ايتيلگن هييت ني آليب بارگن ايشلري باره سيده تقديرلب، اونينگ كنترولي ايچكي ايشلروزيرليگيگه تاپشيريليشي كيره كليگي ني تاكيدله گن.

ييغينده شونينگ ديك، بگرام ده گي محبوسلر دوسيه لري عدلي وقضايي اداره لر آرقه لي تيكشيريليشي باره سيده دستور صادر ايتيلگن.

امريكا رسميلري مذكور تورمه ده گي محبوس لرنينگ دوسيه لري تيكشيريليشي اوچون تعيين ايتيلگن كميته ني صلاحيتسيزليك و ايكله مملكت اورته سيده گي كيليشوونامه گه قرشي ديه تاكيدله ياتگن بير پيتده، افغانستان دولتي بگرام قماقخانه سي باره سيده قرار قبول قيلماقده.

اوتگن آي تشكيل ايتيلگن كميته آرقه لي كميده 650 نفر محبوس نينگ آزاد قيلينيشي دستور صادر ايتيلگني آرتيدن، بيرقطار امريكاليك سناتورلر جمهور رييسي كرزي بيلن اوچره شيب، محبوسلرنينگ قوييب يوباريليشي ايكله مملكت مناسبتلريگه يامان تاثير اوتكزيشي ممكنليگي باره سيده آگاه لنتيردي.