دبي ده افغانستان تينچليك عالي كينگشي و طالبان اورته سيده مذاكره باشلنگن

. بو مذاكره طالبان نينگ سابق قوماندانلريدن بيري معتصم آقاجان رهبرليگي ده آليب باريله دي.

افغانستان رسميلري نينگ بي بي سي گه ايتيشيچه، مذاكره ده طالبان نينگ اون آلتي مهم اعضاسي تينچليك كينگشي رسميلري بيلن مذاكره قيلماقده.

اسمي فاش ايتيليشيني ايسته من بير رسمي نينگ ايتيشيچه، مذكور مذاكره ده عبدالرقيب تخاري و باشقه آلتي اعضا هم شامل ايكن.

افغانستان بو رسمي سيگه كوره، دولت بيلن جنگ قيله ياتگن طالبان نينگ بيش قومانداني هم ييغين ده قتنشگن.

دبي مذاكره سي نيمه نتيجه بيره دي؟

طالبان و افغانستان دولت رسميلري نينگ سونگي هفته دواميده دبي گه كيليب كيتيشي، تينچليك مذاكره لر ده ينگي ايشيك آچيب بيرگني ني كورسته دي.

طالبان سوزچيسي ذبيح الله مجاهد، دبي مذاكره سيني رد ايتماقده.

اما معتصم آقاجان قطرنينگ شكستگه روپه ره بولگن مذاكره لريني كابل نينگ ميلي گه قره ب باشلشگه حركت قيلماقده.

بيرقطار شخصلر معتصم آقاجان ني احتمالآ توركيه طريقيدن غرب و افغانستان دولتي بيلن عرب اميرليگي طريقيدن پاكستان و كويته كينگشي بيلن ثمره لي علاقه ايجاد ايتيشده دبير كورسته ياتگني ني ايتيشماقده.

اما بو سعي و حركت لر ينگي بير جريان اوچون ياردمچي بوله آله ديمي، هنوز معلوم ايمس.

دبي دن پشاورگه قيتگن دن كيين طالبان نينگ آلدينگي اعضالريدن ملا عبدالرقيب نينگ اولديريليشي، مخالفلرنينگ هنوز هم قدرتليگي و تيزكار عمل قيليشيدن دلالت بيره دي.

مولوي عبدالرقيب تخاري اوتگن كون پاكستان نينگ پشاور شهريده نا تنيش قوراللي شخصلر تمانيدن اولديريلدي. او طالبان دوريده مهاجرلر وزيري صفتيده وظيفه بجرردي.

تحليلچيلر، دبي ييغيني قطر اداره سي ياپيگني باعث، تينچليك مذاكره لرجرياني نينگ تيزلشتيريليشي گه كيليب چيقيشي ني ايتيشماقده لر.