كابلده قندهاريلر اوزنامزدلريني تعيين ايتيش مقصديده جرگه اوتكزماقده لر

Image caption زلمي رسول، قيوم كرزي، گل آقاشيرزي و نادر نعيم قندارده گي پشتون دراني قبيله لريدن.

قندهار، هلمند، ارزگان، فراه، هرات و بيرقطار ولايتلري نينگ كميده 170 نفر دراني قبيله لرنينگ قوم ياش اولوغلري كابلده ييغليب، بير مخصوص نامزدني حمايه ايتيش مقصديده كابلده جرگه اوتكزماقده لر.

قندهاريلرنينگ جرگه سي ديب اتلگن بو ييغينده اولر دراني قومي دن بير نفر نامزد چيقه ريب، باشقه لريني اونينگ منفعتيگه اوتكزيشده سعي و حركت قيلماقده لر.

اولرنينگ اساسي مقصدي، كيله جك جمهور رييس قندهاري بوليشي دن عبارت.

زلمي رسول، قيوم كرزي، گل آقا شيرزي و نادر نعيم قندهارده گي دراني قبيله لردن بوله دي. بو قبيله افغانستانده اوزاق ييللردن بيري حكمرانليك سوريب كيلگن.

دراني قبيله لرنينگ قوم ياش اولوغلري اينتركانتينتال هوتليده ييغيليب، جرگه اوتكزيشگن، اما هنوز گچه بيرار بير نتيجه گه ايريشه آلمه گنلر.

دراني پشتون قوملريدن بيري بوليب، قندهار اطرافلريده حيات كيچيريشه دي. بو قتلم اصليده ابدالي ناميگه منسوب. بو قوم احمدشاه دراني دن كيين، دراني ناميگه منسوب بولدي.

جرگه ده گي شخصلرنينگ ايتيشيچه، قبيله رهبرلري نينگ كيليشماوچيليگي سبب، بيرنامزدني حمايه ايتيش نتيجه سيگه ايريشيلمه گن و 20 نفردن عبارت بولگن بير هييت جمهور رييس كرزي بيلن مصلحت قيليشگن.

جرگه اشتراكچيلري نينگ بي بي سيگه ايتيشيچه، مذكور 20 نفرليك گروه قندهاريلر جرگه سي، قيوم كرزي و زلمي رسول دن هر قنده ي قرار قبول قيلگن حالده، اولر تمانيدن قبول بوليشي رخصتيني آلگن.

خبرلرگه كوره، 20 كيشيليك گروه اوز ارا آواز بيريشده، بيرنيچه كيشي زلمي رسول ني حمايه قيليشگن، اما اكثريت قيوم كرزي ني قوللب قوتله گنلر.

اما جرگه اشتراكچيلري حامدكرزي بو قرار ني حمايه ايتمه ي، سيلاولرده اوز اوكه سي نامزدليگي ني حمايه ايتگنليگي ني وجود گه كيلتيريشي ني ايسته مسليگي ني ايتگن.

عين حالده، گل آقا شيرزي جرگه قراريدن خفه بوليب، اوتگن كون بير خبري ييغينده هيچ بير نامزدنينگ منفعتيگه اوتيشيني ايسته مسليگي ني اعلان قيلدي.

جمهور رييس كرزي بار بار سيلاولرده بي طرف بوليشي ني تاكيدلب كيليب، دولت منبع لريدن هيچ بير نامزدنينگ فايده سيگه استعمال قيلمسليگي ايتگن.

اما جرگه نينگ نتيجه سي كيله سي كونلرده معلوم بوليشي ممكن.

سونگي آيلرده عملگه آشيريلگن فكر سوره شده مخالفتده گي رهبر و جهادي شخص عبدالله عبدالله و اشرف غني احمدزي سيلاولرده آلدين كورينه دي. اما دراني لرنينگ احتمالي ايتلافي بو موازنه ني برهم اوره آليشي قادر بوله آله ديمي؟ معلوم ايمس.