شرقی کنرده اویوشتیریلگن هجومده 20 عسکر هلاک ایتیلگن

کنر ولایتی نینگ ولایت حاکمی بی بی سی بیلن بولگن صحبتیده اوتگن کیچه اوشبو ولایت نینگ غازی آباد تومنیده اویوشتیریلگن گروهی هجومده 20 عسکر اولیب باشقه سککیز عسکر هم اسیر آلینگنینی تصدیق له دی.

کنر حاکمی شجاع الملک جلاله گه کوره، 30 – 35 کیشیدن عبارت بولگن قوراللی عصیانچی کیچه اوچ یریم اطرافیده اردو کوچلری نینگ غازی آباد تومنیده گی حربی قرارگاهی گه گروهی هجوم اویوشتیرگن.

اونینگ ایتیشیچه هجوم دن سونگ قرارگاه ده گی افغان عسکرلری و هجومچی لر اره سیده توقنه شوولر باشله نیب کیتگن. عینی حالده او، اوروشلر نتیجه سیده ایککی قوراللی هلاک بولگنینی ایتدی. همده کنرحاکمی طالبلر نینگ نفوذی احتمالی هجوم یوزبیریشی اوچون زمینه یره تگنینی ایتیب بیراق بو خصوصده ارتیق معلومات بیرمه دی.

کنر ولایت حاکمی سوزچیسی عبدالغنی مصمم طالبان و اردو کوچلری اره سیده هلی هم توقنه شوو دوام ایتیب کیله یاتگنینی ایتگن.

افغانستان مدافعه وزیرلیگی سوزچیسی ظاهر عظیمی بی بی سی بیلن بولگن صحبتیده افغان و چیت ایللیک عصیانچیلر کیچه ساعت تورتده ایککی قرارگاه گه هجوم قیلگنینی معلوم قیلدی.

عظیمی جنابلری توتیر صحیفه سیده اویوشتیریلگن هجومده 19 عسکر قربان بولگن دیب یازگن.

کنر ولایتی پاکستان بیلن قوشمه چیگره گه ایگه بولیب طالبان گروهی گه قره شلی قوراللی لر چیگره نینگ ایککی تمانی گه اوتیب قیته یاتگنی ادعا قیلینه دی.پاکستان مقاملری بوندن آلدین پاکستان نینگ 23 چیگره قوریقچی عسکری پاکستان قوراللی طالب لرتمانیدن پاکستان توپراغیده اولدیریلگنیدن خبربیرگن ایدی.افغان مقاملری ایسه بو ادعا نی رد ایتدی.