اوتگن اون ییل ایچیده اوزبیک تیلی قنچه رواجلندی؟

Image copyright bbc uzbek

افغانستان ينگي اساسي قانونيده، دري و پشتو تيللري يانيده باشقه تيللرهم جمله دن اوزبيك وتوركمن تيللري اكثريت سوزله يديگن منطقه لرده رسمي تيل صفتيده تنيلگن و دولت هم اوزبيكلر يشي ديگن منطقه لرده گي مكتبلرده اوزبيكي تيلده درس بيريليشي اوچون قطار كتابلرني نشر ايتگن.

اما بیرقطار ضیالی لر اوتگن اون ییل ایچیده اوزبیک تیلی مقصدگه موافق نتیجه گه ایریشه آلمه گنینی ایتیشماقده.

اوزبیک تیلی قانون ده رسمی تیل صفتیده قید ایتیلگنی دن بیری مقصد گه موافق رواجلنمه دی، دییدی یازووچی و شاعر کاظم امینی.

امینی جنابلری بو تیل شو مدت ایچیده رواجلنمه گنی نی ایترکن، اما مزارشريف ده گي اوزبيك يازووچيلريدن بيري صالح محمد حساس، اون ييل دواميده اوزبيك تيليده يوزلب كتاب نشر ايتيلگن وتعليم درگاه لر و باشقه ساحه لرده هم كته يوتوقلرگه ايريشيلگن دييدي.

او، اوزبیک یوزلب اوزبیک یاشلری عالی معلوماتگه ایگه بولیب، کیملیگی وتاریخلریدن خبردار بولیشدی دییدی.

اونگه کوره، حاضرگی کونده اوزبیک تیلی وادبیاتی مملکت بویلب مینگلب مخلصگه ایگه و هر کونی یاشلر وباله لرآنه تیلینی اورگه نیش اوچون چاپ ایتیله یاتگن کتابلرنی قولگه کیریتیب، اوقیشگه قیزیقماقده لر.

اما امینی جنابلری، نشر ایتیله یاتگن اوزبیک تیلیده گی کتابلرنی معیارگه برابر بولمه گنی و بیر اکادیمیک اداره نظارتی آستیده چاپ ایتیلمه گنی نی علحیده معما ایکنی نی تاکیدله ماقده.

" بو كتابلر بير مخصوص اكاديميك اداره و تيلشناسلر نينگ نظارتي آستيده باسيليب چيقيلمه گني، علحيده معما دييدي،ـ او.

شونگه قره مسدن، افغانستان شماليده تعليم درگاه لريده گي اوزبيك تيل و ادبيات ديپارتمنتلريده هم معما موجود، بو تيليده تدريس قيله ياتگن اوستاذلر و باش ملازملر دولت ني ينگي درسليك چاپ ايتمه ي ياتگنليكده عيبلب، نشر ايتيلگن اوزبيك تيليده گي كتابلرنينگ نرخي قيمتليگي باره سيده شكايت قيليشماقده لر. بلخ بيليم يورتي اوزبيك تيلي ادبيات اداره سي باشليغي مونسه سادات.

Image copyright bbc

بو معما يگانه بير ايكي ولايت ده ايمس، بلكه اوزبيكلر زيچ استقامت قيلاوچي ولايتلر و محل لرده كوپ كوزه تيله دي. اوزبيك تيليده تحصيل آلگن عالي معلوماتلي ياشلر هم ايش سيزليك دن شكايت قيليشه دي، عبدالسميع ايكي آيدن بيري ايش قيديره دي، اما هنوزگچه ايش تاپيشگه موفق بوله آلمه گن.

اما اوزبيك عايله لري قه ييرده بولمه سين، باله لري نينگ آنه تيليده اوقيب يازيشيني خواهلشه دي. اولر باله جانلری دری و پشتو تیللر یانیده آنه تیلی یعنی اوزبیک تیلیده هم اوقیب یازیشلری کیره کلیگی نی طلب قیلیشه دی.

عین حالده، بلخ معارف اداره سی ینگی تعلیم ییلی ده ولایت نینگ اوزبیکلر استقامت قیلاوچی محله لریده گی مکتبلرگه اوزبیک تیلیده درسلیکلرنی ترقه تیشینی نظرده توتگن.

ايريم شخصلر اوزبيك تيلي اوتگن اون ييل ايچيده رواجلنمه دي ديگن تنقيد بيلن چيقيشرايكن، اما بو تيل اساسي قانون ده رسمي تيل صفتيده قيد ايتيلگني آرتيدن، اونلب خصوصي تلويزيون و راديو دري و پشتو تيللري يانيده اوزبيك تيليده كورستوو بيره باشله دي. شو حاضر مملكت و دنيا بويلب كورستوو آليب باره ياتگن كته تلويزيونلرده اوزبيك تيليده خبر، برنامه و قوشيق كورستوولري نمايش ايتيله دي.

بوندن تشقري تورت بيش تيلويزيون و راديو مخصوص شو تيلده ايجاد ايتيليب، كورستوو آليب بارماقده. اوزبيك ياشلري تيل رواجلنيشي اوچون و بونگه خذمت قيليش مقصديده، كتاب و شعر يازيشيب، گزيته لر نشر ايتماقده لر.

افغانستان گه انترنت كيريب كيلگني، اينيقسه فيسبوك اجتماعي ترماغ، ياشلرنينگ بير بيراولري بيلن آنه تيليده يازيشلريگه سبب بوليب، كيمليگي ني انگلب آليشده كته خذمت قيلگن ديسك بوله دي.