تینچلیک عالی کینگشی: دبی مذاکره سی ایجابی نتیجه بیرماقده

افغانستان تینچلیک عالی کینگشی و طالبان گروهی دبی شهریده گی ییغینده طالبان گه اعضا شخصلرنینگ اسملری بیرلشگن ملتلر تشکیلاتی خوفسیزلیک کینگشی نینگ قاره رویخطیدن آلیب تشله نیشیگه قرار قبول قیلیشگن.

طالبان اعضالری نینگ اسملری آلیب تشله نیشی بیلن، مذاکره لر عملگه آشیریلیشی اوچون بو گروه اعضالری نینگ افغانستان ایچکریسی و تشقریسیگه باریب کیلیش زمینه سینی آسانلشتیره دی.

دبی ده بولیب اوته یاتگن بو ییغین ایکینچی ییغین بولیب، اونده معتصم آغاجان رهبرلیگی ده طالبان بیر تعداد اعضالری و افغانستان تینچلیک عالی کینگشی اشتراک ایتیشگن. افغانستان تینچلیک عالی کینگشی و اوزینی طالبان اسلامی حرکتی اعضاسی دیب تنیشتیرگن معتصم آغاجان رهبرلیگی ده گی بیر گروه طالبلر، دبی ده گی مذاکره لرنتیجه سی دن راضی لیک بیلدیریشگن.

بی بی سی اختیاریگه قوییلگن طالبان حرکتی نینگ بیر اعلامیه سیده، ایکله تمان افغانستان ده تینچلیک و حاکمیت تامینلنیشی اوچون صداقت بیلن ایش قیلیشلرینی وعده قیلیب، افغانستان ده گی بحران گه ایچیم یول تاپیش اوچون جدی سعی و حرکت قیلیشلری باره سیده تاکیدلشگنی قید ایتیلگن. بو اعلامیه ده جمهور رییس حامدکرزیگه، بگرام قماق خانه سیده گی طالب محبوسلرنی قوییب یوبارگنلیگی اوچون منتدارچیلیک بیلدیریلگن.

بو گروه بوندن تشقری، افغانستان دولتی دن تورلی گناهکارلیکده عیبلنیب قماققه آلینگن شخصلرنی آزاد ایتیشینی سوره گن. اعلامیه ده شونینگ دیک، افغانستان تینچلیک عالی کینگشی و طالبان رهبرلری دبی ده گی ییغینده، افغانستان بیرلشگن ملتلر تشکیلاتی خوفسیزلیک کینگشی دن قاره رویخطگه آلینگن طالبان اعضالری نینگ اسملری چیقه ریب تشله نیشی سوره شی باره سیده کیلیشیب آلینگنی معلوم قیلینگن.

آلدینراق افغانستان دولت رسمیلری بی بی سی گه دبی ییغینده طالبان نینگ اون آلتی مهم اعضاسی اشتراک ایتگنی نی ایتیشدی. باشقه تماندن افغانستان تینچلیک عالی کینگشی اعضاسی اسماعیل قاسمیار، دبی ییغینیده ایکله تمان بیر ایجابی نتیجه گه ایریشیشی اوچون مذاکره لرنینگ گه زمینه یره تیلیشی حقیده قرار قبول قیلینگنی نی معلوم قیلدی:"بولر طالبان حرکتی نینگ مهم اعضالریدن مثال اوچون سابق وزیرلردن عبارت. طالبان رهبرلریدن بر تعدادی تورلی جنایتچیلیکده عیبلنگن وقاره رویخطگه کیریتیلگن، مذاکره لرنینگ دوامی اوچون و بولرنینگ ایچکی وتشقی مملکتلرگه باریب کیلیشی اوچون رویخط دن چیقه ریلیشی کیره ک. بیز شومسله اوستیده گپلشدیک". صلح تامینلنیشی اوچون امیدلر کوپه یرایکن، بوندن طالبان رهبری ملاعمر دبی ییغینیده طالبان نینگ هیچ بیر نمانیده سی اشتراک ایتمه گنی نی اعلان قیلگندی.

باشقه تماندن طالبان سوزچیسی ذبیح الله مجاهد، بو گروه رهبری امریکا بیر عسکری عوضیده گوانتاناموده گی طالباندن بیر نیچه ته سی نینگ قوییب یوباریلیشی جریانی نی بیر مدتگچه کیچیکتیریشی باره سیده قرار قبول قیلگنی نی ایتدی.